محبوب نگر میں ٹی آر ایس کی 20ویں یوم تاسیس سے ریاستی وزیر سرینواس گوڑ کا خطاب
محبوب نگر ۔28 اپریل ( سیاست ڈسٹرکٹ نیوز) آج کے تلنگانہ میں عوام بلالحاظ مذہب علحدہ تلنگانہ کے ثمرات سے مستفید ہورہے ہیں ۔ ان خیالات کا اظہار ریاستی وزیر سرینواس گوڑ نے مستقر محبوب نگر پر ٹی آر ایس کی 20ویں یوم تاسیس تقریب کو مخاطب کرتے ہوئے کیا ۔ اس موقع پر انہوں نے پارٹی پرچم بھی لہرایا ۔ انہوں نے مزید کہا کہ تلنگانہ کا حصول بڑی زبردست جدوجہد اور مسلسل محنت کا نتیجہ ہے ۔ کے چندر شیکھر راؤ نے اپنی صلاحیتوں اور دور اندیشی سے کئی قومی جماعتوں کی تائید اور عوام کے مکمل تعاون سے تلنگانہ قیام کو یقینی بنایا اور پھر تلنگانہ کو ملک بھر میں ایک مثالی ریاست بنانے کی سمت رواں دواں ہیں ۔ انہوں نے محبوب نگر کے ماضی کا ذکر کرتے ہوئے کہا کہ یہ ضلع قحط اور خشک سالی اور نقل مقام کیلئے شہرت رکھتا تھا لیکن آج وہی محبوب نگر ’’ مہا نگر ‘‘ میگا سٹی کا درجہ حاصل کرنے جارہا ہے ۔ پالمور ، رنگاریڈی لفٹ اریگیشن پراجکٹ کے ذریعہ ضلع میں معقول پانی کی سربراہی کا کام زوروں پر جاری ہے ۔ ریاستی وزیر نے کہا کہ مجھے اس بات پر فخر ہے کہ روز اول سے ہی میں پارٹی سے وابستہ رہا ، ٹی آر ایس حکومت ریاست کے مستحقین کے مسائل کو حل کرنے کیلئے سنجیدہ ہے اور کئی ایک اسکیمات کے ذریعہ ان کے مسائل کی یکسوئی کی جارہی ہے جس کی ملک بھر میں سراہنا کی جارہی ہے ۔ بعد ازاں انہوں نے ینگنڈہ کے یتیم خانے میںمیوہ جات تقسیم کئے اور یتیم بچوں کے ساتھ دل جوئی کی نیت سے انہوں نے وقت بھی گذارا ۔ آر اینڈ بی گیسٹ ہاؤز کے احاطہ میںشہدائے تلنگانہ کی یادگاروں پر عقیدت کے پھول نچھاور کئے ۔ان کے ہمراہ چیرمین بلدیہ نرسمہلو ، ٹی آر ایس ٹاؤن صدر وینکٹیا ، بی جناردھن ، کونسلر بلدیہ ونجا و دیگر موجود تھے ۔
