نئی دہلی : کانگریس جنرل سکریٹری جے رام رمیش نے وزیر اعظم نریندر مودی پر تنقید کی اور کہا کہ وزیر اعظم مودی اپنی گرتی ہوئی شبیہ کو بچانے کیلئے کسی بھی حد تک گر سکتے ہیں۔ کانگریس لیڈر نے یہ باتیں یو جی سی کو تمام یونیورسٹیوں میں سیلفی پوائنٹس بنانے کی ہدایت پر سوال اٹھاتے ہوئے کہیں۔ جے رام رمیش نے کہا کہ مودی کوریا کے تاناشاہ کے برابر آ چکے ہیں۔ انہوں نے ایکس پر لکھا کہ سیلفی اور سیلفی کے جنون میں مبتلا ہمارے وزیر اعظم لوک سبھا انتخابات سے پہلے انتہائی غیر محفوظ نظر آ رہے ہیں۔ انہوں نے مزید لکھاکہ سب سے پہلے فوج کو سیلفی پوائنٹس قائم کرنے کے لیے کہا گیا۔ اس کے بعد آئی اے ایس افسران اور دیگر سینئر سرکاری عہدیداروں کو رتھ یاترا نکالنے کو کہا۔ اب انہوں نے یو جی سی کو تمام یونیورسٹیوں میں سیلفی پوائنٹس بنانے کی ہدایت دی ہے۔
جے رام رمیش نے پی ایم مودی پر یہ بھی الزام لگایا ہے کہ وہ اپنی تشہیر کے لیے ہر پروگرام میں زبردستی داخل ہوتے ہیں۔ انہوں نے کہا کہ اس سے قبل انہوں نے لائیو فیڈ پر آ کر چندریان تھری کی لینڈنگ کو ہائی جیک کیا تھا۔ اس سے پہلے بھی وہ کووڈ ویکسین کے تمام سرٹیفکیٹس پر اپنی تصویر چھپوا چکے تھے۔ یہ صرف چند مثالیں ہیں جو انسان کی بے پناہ عدم تحفظ اور اس کے اردگرد گھیری ہوئی نفرت انگیزی کو ظاہر کرتی ہیں۔کانگریس لیڈر نے کہا کہ ملک کے عوام پچھلے 10 سالوں سے یہ سب کچھ دیکھ رہے ہیں اور اب اس آخری حد آ چکی ہے۔ رمیش نے لکھا کہ 10 سال کے اختتام تک، ہندوستان کے لوگ وزیر اعظم کے ان مضحکہ خیز خود کو فروغ دینے والے طریقوں سے تنگ آ چکے ہیں۔
