جدہ ۔4 جون (سیاست ڈاٹ کام)طائف محکمہ صحت نے ایک سرکاری دواخانہ کے سربراہ اور انتظامیہ کے 8 عہدیداروں کے خلاف کارروائی کرتے ہوئے انہیں معطل کر دیا ہے۔مذکورہ افراد نے عید ملن پروگرام منعقد کرتے ہوئے تمام عملہ کے لیے اجتماعی کھانے کا اہتمام کیا تھا۔ طائف محکمہ صحت کے ترجمان عبد الہادی الربیعی نے کہا ہے کہ کورونا وائرس کے انسداد کے لیے اختیار کی جانے والی حفاظتی تدابیر کی خلاف ورزی اور اجتماعات منعقد کرنے پر دواخانہ کے سربراہ اور انتظامیہ کو معطل کرنے علاوہ تفتیشی کمیٹی کے حوالے کر دیا گیا ہے۔دواخانہ کے سربراہ نے تمام اسٹاف کے ساتھ عید ملین پروگرام منعقد کیا، اس مقصد کے لیے بکرے ذبح کروائے گیے اور اجتماعی کھانا کھایا گیا۔انتظامیہ نے عملہ کے مرد کارکنوں کے ساتھ خواتین عملے کے لیے بھی الگ سے کھانے کا اہتمام کیا۔انہوں نے کہا ہے کہ وزارت صحت اور وزارت داخلہ نے واضح طور پر ہدایات کر رکھی ہیں کہ کسی بھی قسم کے اجتماعات منعقد نہیں ہوں گے اور خاص طور پر دفاتر میں لوگوں کا ایک جگہ اکٹھا ہونا بالکل منع ہے۔
