غزہ: غزہ پٹی میں جمعرات کو اسرائیلی حملوں میں کم از کم 21 فلسطینی ہلاک اور متعدد زخمی ہوگئے ۔غزہ کے شہری دفاع کے ترجمان محمود بسل نے بتایا کہ اسرائیلی جنگی طیاروں نے شمالی غزہ کے قصبے بیت لاہیا میں ایک رہائشی مکان پر حملہ کیا جس میں بچوں اور خواتین سمیت نو افراد کی موت ہوگئی۔انہوں نے کہا کہ غزہ شہر کے مغرب میں الشطی پناہ گزین کیمپ کے باہری علاقے میں فلسطینیوں کے اجتماع پر اسرائیلی فضائی حملے میں تین نوجوان ہلاک اور چار زخمی ہو گئے ۔ترجمان نے بتایا کہ اس کے علاوہ اسرائیلی فضائی حملوں اور گولہ باری میں غزہ کے جنوبی قصبے خان یونس، دیر البلاح شہر، وسطی غزہ میں نصیرت پناہ گزین کیمپ اور غزہ شہر کے مشرق میں شجاعیہ محلے میں گھروں، اسکول اور ٹینٹ ہاؤس کو نشانہ بنایا گیا جس میں ایک لڑکی اور ایک خاتون سمیت 9 افراد ہلاک ہوئے ۔اسرائیلی فوج نے ابھی تک ان واقعات پر کوئی تبصرہ نہیں کیا ہے ۔اسرائیل نے جنوری میں حماس کے ساتھ جنگ بندی معاہدے کے پہلے مرحلے کی میعاد ختم ہونے کے بعد 2 مارچ کو غزہ میں سامان اور رسد کا داخلہ بند کر دیا اور 18 مارچ کو غزہ پر دوبارہ حملے شروع کر دیے ۔جمعرات کو غزہ میں صحت افسران کی جانب سے جاری کئے گئے اعدادوشمار کے مطابق اب تک 2,651 فلسطینی ہلاک اور 7,223 زخمی ہو چکے ہیں۔اسرائیلی ناکہ بندی کے درمیان دیر البلاح میں الاقصیٰ شہید اسپتال کے ترجمان خلیل الدقران نے جمعرات کو ایک بیان میں کہا کہ غزہ کے اسپتالوں میں ناکہ بندی کی وجہ سے ادویات کی شدید قلت سے زخمیوں میں سے کئی افراد کی موت ہو سکتی ہے ۔جمعرات کو بھی غزہ سول ڈیفنس نے ایک پریس بیان میں کہا کہ اسرائیلی ناکہ بندی اور حملوں کے دوران ایندھن کی قلت کے باعث اس کی 75 فیصد گاڑیوں بند ہوگئیں اور جنریٹرز اور آکسیجن کے آلات کی بھی شدید قلت ہے ۔