غزہ،23 دسمبر (یو این آئی) غزہ میں دواؤں کی خطرناک حد تک قلت پیدا ہوگئی جس کے باعث اسپتالوں میں زیرعلاج ہزاروں مریضوں کی زندگیوں کو خطرات لاحق ہوگئے ۔ غزہ کی محکمہ صحت کا کہناہے کہ دواؤں کی شدید قلت کے باعث مریضوں کے علاج میں شدید دشواری کا سامنا کرنا پڑرہا ہے جبکہ لیبارٹری ٹسٹ اور بلڈ بینک کے سامان کی قلت کی شرح 59 فیصد تک پہنچ گئی۔ غزہ کے ہاسپٹلس میں کام کرنے والے ڈاکٹرز کا کہنا ہے انہیں مریضوں کی جان بچانے میں شدید مشکلات کا سامنا ہے کیونکہ مریضوں کی تندرستی اور صحتیابی کیلئے جن ادویات کی اشد ضرورت ہے وہ تمام دوائیں مکمل طور پر ختم ہوچکی ہیں۔ غزہ میں جنگ بندی کے باوجود انسانی امداد کی رسائی ضرورت کے مطابق نہیں ہورہی۔