نئی دہلی 27اگست (یواین آئی) ہندوستان نے اسرائیل اور حماس کے درمیان جاری تنازعہ کے دوران غزہ کی پٹی پر حملے میں صحافیوں کی ہلاکت کی مذمت کرتے ہوئے اسے افسوسناک قرار دیا ہے۔ غزہ کی پٹی کے خان یونس میں حملوں میں صحافیوں کی ہلاکت کے حوالے سے میڈیا کے سوالات کا جواب دیتے ہوئے وزارت خارجہ کے سرکاری ترجمان رندھیر جیسوال نے چہارشنبہ کو کہا کہ ہندوستان نے ہمیشہ تنازعات کے دوران شہریوں کی ہلاکت کی مذمت کی ہے ۔ انہوں نے کہا کہ “صحافیوں کا قتل انتہائی افسوسناک ہے ۔
ہندوستان نے ہمیشہ تنازعات میں شہریوں کی ہلاکت کی مذمت کی ہے ۔ ہم سمجھتے ہیں کہ اسرائیلی حکام نے پہلے ہی تحقیقات شروع کر دی ہیں۔” قابل ذکر ہے کہ پیر کو غزہ کی پٹی پر اسرائیلی حملے میں پانچ صحافی مارے گئے تھے ۔ اس پر دنیا بھر میں اسرائیلی افواج کو تنقید کا نشانہ بنایا جا رہا ہے ۔
