یروشلم، 29 ستمبر (یو این آئی) اسرائیلی دفاعی فوج نے گزشتہ 24 گھنٹوں کے دوران غزہ کی پٹی میں 140سے زیادہ اہداف پر حملے کیے ۔اسرائیل کی دفاعی افواج نے ایک بیان میں کہا ہے کہ اس کی فضائیہ نے گزشتہ 24 گھنٹوں کے دوران غزہ کی پٹی میں 140 سے زیادہ اہداف کو نشانہ بنایا۔ آئی ڈی ایف نے دعویٰ کیا کہ ان ٹھکانوں میں عسکریت پسندوں کے سیل، فوجی عمارتیں، ٹینک شکن پوزیشن اور دیگر بنیادی ڈھانچے شامل تھے ۔ فلسطین کی سرکاری خبر رساں ایجنسی وفا نے بتایا کہ غزہ کی پٹی میں گزشتہ روز اسرائیلی حملوں کے نتیجے میں 50 افراد جاں بحق اور 184 دیگر زخمی ہوئے ۔ آئی ڈی ایف کے مطابق، اس کی بکتر بند فوجی دستوں نے غزہ شہر میں عسکریت پسندوں کو ہلاک کیا، دھماکہ خیز مواد کو ناکارہ بنایا اور عمارتوں کو تباہ کیا۔ شمالی غزہ میں، آئی ڈی ایف کی فوج نے مشاہداتی چوکیوں کو نشانہ بنایا، جبکہ بحریہ نے ہتھیاروں کے ایک ڈپو اور حماس کی عمارتوں کو تباہ کر دیا۔
غزہ کے شہریوں کیلئے ٹرمپ کا
امن منصوبہ محض ایک تماشہ
غزہ، 30 ستمبر (یو این آئی) غزہ پٹی کے رہائشیوں نے امریکی صدر ڈونالڈ ٹرمپ کی جانب سے پیش کیے گئے امن منصوبہ پر شکوک و شبہات کا اظہار کرتے ہوئے اسے ’تماشہ‘قرار دیا ہے ۔ جنوبی غزہ کے علاقہ المواسی میں 39سالہ ابراہیم جودہ نے اپنے شیلٹر میں گفتگو کرتے ہوئے کہا کہ یہ بالکل واضح ہیکہ یہ منصوبہ غیر حقیقی ہے۔ اسرائیلی بمباری سے تباہ ہرنے والے رفح شہر کے رہائشی، کمپیوٹر پروگرامر ابراہیم جودہ نے کہا کہ یہ ایسی شرائط کے ساتھ تیار کیا گیا منصوبہ ہے ، جنہیں امریکہ اور اسرائیل جانتے ہیں کہ حماس کبھی قبول نہیں کرے گا، ہمارے لیے اس کا مطلب ہیکہ جنگ اور تکالیف جاری رہیں گی۔
