نیویارک: اقوام متحدہ کی سلامتی کونسل میں ایک بار پھر غزہ کو امداد دینے سے متعلق قرارداد پر ووٹنگ نہ ہوسکی، امریکی اعتراضات کے باعث سلامتی کونسل میں غزہ جنگ بندی کی قرار داد پر ووٹنگ مسلسل چوتھے روز مؤخر کردی گئی، اب قرار داد پر ووٹنگ آج رات ہونے کا امکان ہے۔خبر رساں ادارے اے ایف پی کے مطابق کئی دنوں کی تاخیر کے بعد تازہ ترین مسودے میں غزہ میں ’فوری طور پر محفوظ اور بلا روک ٹوک انسانی ہمدردی کی رسائی کی اجازت دینے اور کشیدگی کے پائیدار خاتمے کیلئے ساز گار حالات پیدا کرنے کیلئے فوری اقدامات‘ کا مطالبہ کیا گیا ہے۔سفارتی ذرائع کے مطابق امریکہ کو قرار داد کے مسودے میں شامل سیز فائرکا لفظ اور دشمنی کے خاتمے جیسے الفاظ پر اعتراض ہے تاہم اس حوالے سے ارکان کے مذاکرات جاری ہے۔امریکی سفیر لنڈا تھامس گرین فیلڈ نے جمعرات کی شب صحافیوں کو بتایا: ’اگر (نئے مسودے کے ساتھ) یہ قرارداد پیش کی جاتی ہے تو ہم اس کی حمایت کر سکتے ہیں۔‘تاہم انہوں نے اس بات کی تردید کی کہ قرارداد کے اصل مسودے پر پانی پھیر دیا گیا ہے۔ ان کا کہنا تھا کہ یہ (نیا مسودہ) ’بہت مضبوط‘ ہے اور اسے ’عرب گروپ کی طرف سے مکمل حمایت حاصل ہے۔‘مین ہیٹن میں اقوام متحدہ کے ہیڈکوارٹرز میں متحدہ عرب امارات کی طرف سے تیار کردہ اس قراردار پر ووٹنگ اس سے قبل تین بار مؤخر ہو چکی ہے۔انٹرنیشنل کرائسس گروپ کے تجزیہ کار رچرڈ گوون نے کہا: ’اس (نئے مسودے) میں استعمال ہونے والی زبان کے الفاظ بے معنی ہیں۔‘ان کے بقول: ’کونسل کے دیگر ارکان کو یہ فیصلہ کرنا ہوگا کہ آیا وہ صرف اتفاق رائے پر پہنچنے کی خاطر کمزور متن پر سمجھوتہ کر لیں گے۔‘
فرانسیسی صدر کی اردن آمد
شاہ عبداللہ سے تبادلہ خیال
عمان : اسرائیل کی غزہ میں جاری جنگ کے دوران فرانسیسی صدر ایمانوئیل میکرون دوسری بار مشرق وسطیٰ میں ہیں۔ انہوں نے اکتوبر میں بھی اسرائیل وغیرہ کا دورہ کیا تھا۔ وہ اسرائیل میں ملاقاتیں مکمل کرنے کے بعد اردن پہنچ گئے۔ انہوں نے اردن کے شاہ عبداللہ سے شاہی محل میں خطے کی صورتحال پر تبادلہ خیال کیا ہے۔ فرانس بھی اسرائیل کا اہم اتحادی ملک ہے۔ میکرون نے اپنے پچھلے دورہ میں اسرائیل کے ساتھ کندھے کندھا ملا کے کھڑے ہونے کا اعلان کیا تھا۔تاہم اب 8 ہزار فلسطینی بچوں اور 6200 عورتوں سمیت 20 ہزار سے زائد ہو چکی شہادتوں کے بعد حمایت جاری رکھنے کے باوجود لہجہ قدرے بدل دیا گیا ہے۔
صدر میکرون خطے میں تعینات فرانسیسی فوجیوں سے بھی کرسمس کے سلسلے میں ملاقات کریں گے اور ان کے حوصلے بڑھائیں گے۔
جمعرات کے روز وہ اردن کے بندرگاہی شہر عقبہ میں اترے تو شاہ عبداللہ ان کے خیرمقدم کیلئے موجود تھے۔ماہ اکتوبر سے اب تک یہ میکرون اور شاہ عبداللہ کے درمیان دوسری ملاقات ہے۔ اس دوران غزہ کی مکمل تباہی کا عمل مکمل ہو گیا ہے۔ ہزاروں ہلاکتوں کے علاوہ 20 لاکھ فلسطینی اسرائیلی بمباری سے بے گھر ہو کر نقل مکانی کے دوران پانی کی بوند بوند اور روٹی کے نوالے کیلئے پریشان ہیں۔