نیویارک۔ 9 اگست (یو این آئی) غزہ کی صورتحال پر اقوام متحدہ کی سلامتی کونسل کا ہنگامی اجلاس طلب کرلیا گیا۔ عرب میڈیا کے مطابق یو این سلامتی کونسل کا اجلاس ہفتہ کو ہوگا۔ عرب میڈیا کے مطابق یو این سلامتی کونسل کا اجلاس طلب کرنے کی درخواست 15 میں سے 14 رکن ممالک نے کی۔ دوسری جانب امریکہ نے یو این سلامتی کونسل اجلاس بلانے کی مخالفت کی ہے ۔ یاد رہے کہ غزہ پر مکمل قبضے کے اسرائیلی کابینہ کے فیصلے کے بعد جمعے کو بھی دن بھر غزہ میں فلسطینیوں کا قتل عام جاری رہا۔ اسرائیل کی تازہ بم باری سے امداد کے منتظر 11 فلسطینیوں سمیت 36فلسطینی شہید ہو گئے ۔ غزہ کے محکمہ صحت کے مطابق 24 گھنٹوں میں بھوک سے مزید 4 فلسطینی شہید ہوئے ۔ بھوک سے مرنے والے فلسطینیوں کی تعداد 201 ہو گئی۔غزہ میں امدادی ڈبے کے نیچے آ کر ایک بچہ بھی شدید زخمی ہو گیا۔
اسرائیل کے غزہ پر قبضہ کے منصوبہ سے اقوام متحدہ کا اظہار تشویش
اقوام متحدہ۔ 9 اگست (یو این آئی)اسرائیل کا غزہ پر فوجی قبضے کے منصوبے پر اقوام متحدہ کے سیکریٹری جنرل انتونیو گوتیرس نے تشویش کا اظہار کیا ہے ۔ انتونیو گوتیرس کی ترجمان نے کہا ہے کہ انتونیو گوتیرس غزہ پر قبضے کے اسرائیلی فیصلے سے سخت پریشان ہیں۔ اس معاملے پر انتونیو گوتیرس کا کہنا ہے کہ اس منصوبے سے فلسطینیوں کی تباہ حالی میں خطرناک حد تک اضافہ ہوجائے گا۔ انتونیو گوتیرس کی جانب سے اسرائیل سے عالمی قوانین کے تحت ذمے داریاں پوری کرنے کا مطالبہ بھی کیا گیا ہے ۔