غزہ : جنگ سے متاثرہ غزہ کے ہاسپٹلس کے صحن میں بے ہوش کیے بغیر زخمیوں کے آپریشنس کیے جا رہے ہیں۔ اْن لوگوں کی زندگیاں بچانے کی کوشش کی جارہی ہے جن میں جینے کی امید باقی ہے جبکہ دیگر کو مرنے کے لیے چھوڑ دیا گیا ہے۔غزہ میں وزارت صحت کے ترجمان ڈاکٹر مدحت عباس نے میڈیا سے گفتگو کرتے ہوئے کہا کہ ہاسپٹلس کے صحن، آپریشن رومز اور ایمرجنسی کی زمین پر سینکڑوں افراد پڑے ہیں، ان افراد میں اکثریت معصوم بچوں کی ہے۔غیر ملکی میڈیا کے مطابق القدس اور الشفا اسپتال اور ہلال احمر کے ہیڈ کوارٹر کے قریبی علاقوں پر 30 منٹ تک بمباری کی گئی جبکہ غزہ سٹی اور جنوبی علاقوں میں بھی رہائشی عمارتوں پر تازہ حملے کیے گئے۔رپورٹس کے مطابق ان حملوں میں عورتوں اور بچوں سمیت مزید کئی فلسطینی شہید ہوئے ہیں۔علاوہ ازیں مغربی کنارے کے علاقوں رملہ اور نابلس میں بھی اسرائیلی فورسز نے 5 فلسطینیوں کو شہید کر دیا۔واضح رہے کہ 17 اکتوبر کو اسرائیلی فوج نے غزہ میں زخمیوں سے بھرے ہاسپٹل پر بمباری کی تھی جس سے بچوں اور خواتین سمیت 500 فلسطینی شہید جبکہ سینکڑوں شدید زخمی ہو گئے تھے۔
