حیدرآباد۔ تلگودیشم کے قومی صدر این چندرابابونائیڈو نے الزام لگایا کہ اے پی میں غیر ذمہ دار وائی ایس آرکانگریس کی وجہ سے صنعتی حادثات پیش آرہے ہیں۔انہوں نے سوال کیا کہ آیا اس نے 7مئی کو ایل جی پالی مرس کمپنی میں گیاس کے اخراج کے واقعہ سے کچھ سبق حاصل کیا۔اپنے بیان میں سابق وزیراعلی نے الزام لگایا کہ تین بڑے صنعتی واقعات وشاکھاپٹنم میں وزیراعلی وائی ایس جگن موہن ریڈی کی غیر ذمہ داری کی وجہ سے پیش آئے ہیں کیونکہ حکومت سلامتی کے اقدامات کرنے میں ناکام ہوگئی ہے ۔انہوں نے کہا کہ ان صنعتوں کے انتظامیہ کی جانب سے سلامتی کے قواعد پر عمل نہیں کیاجارہا ہے جس کے نتیجہ میں بڑے پیمانہ پر ایسے واقعات پیش آرہے ہیں۔انہوں نے کہا کہ مرنے والے افراد کے ارکان خاندان نے وشاکھاسالونٹ کمپنی کے سامنے لاش کے ساتھ دھرنا دیا۔جب تلگودیشم،سی پی آئی، بی جے پی،جناسینا اور ٹریڈ یونین کے لیڈر متاثرین کو پُرسہ دینے کے لئے جارہے تھے تو ان کو گرفتارکرتے ہوئے چھ گھنٹوں تک پولیس اسٹیشن میں محدود رکھاگیا۔