حیدرآباد۔تلنگانہ بھر میں غیر زرعی اراضیات اور جائیدادوں کے رجسٹریشن کے عمل کا آج سے آغازہوا۔تلنگانہ کے 141 سب رجسٹرار دفاتر میں یہ عمل شروع ہوا۔می سیوامراکز پر دس بجے دن سے 5.30بجے شام تک سلاٹ کی بکنگ کا کام کیاجارہا ہے ۔عہدیداوں کو ہدایت دی گئی کہ سلاٹ بکنگ کیلئے صرف 200روپئے ہی وصول کئے جائیں۔ میوٹیشن کے زیر التواء معاملات دھرانی پورٹل پر حکام کیلئے دستیاب ہیں۔ رجسٹریشن میں کسی بھی دشواری کی صورت میں عہدیداروں کو فوری یکسوئی کی ہدایت دی گئی ہے ۔ پورٹل میں کسی تکنیکی خرابی سے نمٹنے کیلئے 100 عہدیداروں اور ماہرین کو بی آر کے بھون میں قائم کردہ وار روم میں تعینات کیا گیا ہے ۔ رجسٹریشن کی تکمیل کے فوری بعد ای پاس بک جاری کی جارہی ہے ۔ عہدیداروں کو رجسٹریشن کے علاوہ کوئی زائد اختیارات حاصل نہیں ہیں۔ سلاٹ بکنگ کے بعد اراضیات کی خرید و فروخت، گفٹ، سیل ڈیڈ، مورٹ گیج اور ڈیولپمنٹ جیسے معاہدوں کی تکمیل کی جاسکتی ہے ۔ رجسٹری کیلئے آدھار کی پیشکشی لازمی نہیں ہے ۔ اس کے متبادل کے طور پر کوئی اور دستاویز پیش کیاجاسکتا ہے جس کو قبول کیاجارہا ہے ۔ عوام کو رجسٹریشن دفاتر سے رجوع ہونے کی ضرورت نہیں ہے بلکہ وہ اپنے مقررہ وقت پر رجوع ہوکر رجسٹریشن کی کارروائی کی تکمیل کرسکتے ہیں۔ رجسٹریشن کے سلسلہ میں کسی بھی خامی سے بچنے تمام تر احتیاطی قدم اٹھائے گئے ہیں۔ رجسٹریشن کیلئے سابق کے طریقہ کار پر عمل کیا جارہا ہے اور چارجس بھی سابق کی طرح وصول کئے جارہے ہیں۔ واضح رہے کہ ریاست میں تقریبا تین ماہ بعد رجسٹریشن کا عمل شروع ہوا ہے ۔