لندن : حالیہ دنوں میں جب سے کوویڈ ویکسین کی ٹیکہ اندازی شروع کی گئی ہے تو اس کے بعد مختلف اسٹڈیز بھی کی جارہی ہیں اور اسی طرح کی ایک تازہ ترین اسٹڈی کے ذریعہ یہ بات سامنے آئی ہیکہ فائزر اور آکسفورڈ ایسٹرازینکا ویکسین 70 سال اور اس سے زائد کی عمر والے افراد کیلئے انتہائی مؤثر ثابت ہورہی ہے۔ مذکورہ اسٹڈی (تحقیق) پر اب تک یوں تو کوئی خاص تبصرے سامنے نہیں آئے ہیں لیکن لیباریٹری ٹسٹنگ کے بعد انگلینڈ میں 70 سال یا اس سے زیادہ کی عمر والوں کیلئے ویکسین کو بیحد متاثرکن پایا گیا ہے۔ محققین میں پبلک ہیلتھ انگلینڈ
(PHE)
بھی شامل ہیں، نے جو رپورٹ پیش کی ہے وہ یقینا خوش آئند ہے کیونکہ 70 اور 80 سال کی عمر والے جن کوویڈ مریضوں کو ان کے متاثر ہونے سے یا ان کی موت سے 14 روز قبل ٹیکہ اندازی کی گئی تھی تو ان لوگوں میں اموات کی شرح ان لوگوں سے بہت کم پائی گئی جنہوں نے ٹیکہ لئے ہی نہیں۔ مزید تفصیلات بتاتے ہوئے یہ بھی کہا گیا ہیکہ ڈیٹا 70 یا 80 سال سے زائد عمر والوں میں 80 فیصد ایسے افراد ہیں جن کو ویکسین کی صرف ایک ہی خوراک دی گئی اور وہ کام کر گئی۔ پبلک ہیلتھ انگلینڈ
(PHE)
کے مطابق خوراک لینے کے اندرون 3 تا 4 ہفتہ مریض بالکل شفایاب ہوگئے۔ فائزر ویکسین کی ٹسٹنگ کے بعد کوویڈ۔19 کی اموات کی شرح میں 83 فیصد کمی ہوئی۔ دوسری طرف ویکسین کی صرف ایک خوراک لینے کے بعد 70 سال سے زائد افراد بھی کوویڈ سے غیرمتاثرہ پائے گئے اور ان میں انفیکشن کی کوئی علامات نہیں پائی گئی۔ رپورٹ میں یہ بھی بتایا گیا ہیکہ دونوں ہی ویکسین دیئے جانے کے بعد دیڑھ ماہ کے عرصہ تک مریضوں کو سخت جانچ میں رکھا گیا اور یہ معلوم ہوگیا کہ کورونا کی نئی اقسام کیلئے بھی دونوں ہی ویکسین انتہائی مؤثر ہیں اور دونوں کے اثرات تقریباً یکساں ہیں۔ پی ایچ ڈی کی ایمونائزیشن سربراہ میری رامسے نے بتایا کہ ویکسین اب انفیکشن اور موت سے بچانے کا کام کررہی ہے۔ انہوں نے کہا کہ اب بھی بہت سی تفصیلات آنا باقی ہیں لیکن فی الحال یہ بات بھی اطمینان بخش طمانیت سے بھرپور ہیکہ ویکسین کے استعمال سے قابل لحاظ تبدیلی آئی ہے۔ تاہم اب بھی یہ کہا نہیں جاسکتا کہ آیا کوروناوائرس کو ایک انسان سے دوسرے انسان تک منتقلی کو روکنے کیلئے ویکسین صدفیصد کارآمد ثابت ہوتی ہے یا نہیں۔ اگر آپ نے ویکسین لی ہے تو اس کے باوجود بھی آپ کو ایسا برتاؤ کرنا پڑے گا جیسے آپ وائرس سے متاثرہ ہیں۔ حفظان صحت کا خیال رکھیں اور گھر پر ہی رہیں۔