سری نگر،29اگست(یو این آئی) نیشنل کانفرنس کے صدر ڈاکٹر فاروق عبداللہ نے آج آثار شریف درگاہ حضرت بل میں حاضری دی اور وہیں نماز جمعہ بھی ادا کی۔ ڈاکٹر فاروق نے اس موقعہ پر جموں وکشمیر میں مکمل امن و امان، عالم اسلام کی سربلندی، عالم انسانیت کی بقا، لوگوں کی خوشحالی و ترقی اور فلسطینی عوام کی فتح و نصرت کیلئے دعا کی۔انہوں نے فرزندانِ توحید سے اپیل کی کہ وہ عالم اسلام کی فتح نصرت اور فلسطینی عوام کو درپیش موجودہ چیلنجوں سے نجات کیلئے خصوصی دعائوں کا اہتمام کریں۔ یاد رہے کہ ان دونوں حضرت میں عید میلادلنبیؐ کے ایام متبرکہ جاری ہیں۔ اس سلسلے میں ڈاکٹر فاروق عبداللہ نے زائرین کیلئے گئے انتظامات کی جانکاری بھی حاصل کی اور اُمید ظاہر کی کہ امسال عقیدتمدوں کیلئے معقول اور مناسب انتظامات رکھے جائیں گے کیونکہ یہاں سب سے بڑا اجتماع منعقد ہوتا ہے ۔
کھیلوں کے قومی دن پر عوام کو وزیر اعظم کی مبارک باد
نئی دہلی، 29 اگست (یو این آئی) وزیراعظم نریندر مودی نے ہندستان کے کھیلوں کے قومی دن کے موقع پر عوام کو مبارکباد دی ہے جو ہر سال 29 اگست کو ہاکی کے مایہ ناز کھلاڑی میجر دھیان چند کے اعزاز میں منایا جاتا ہے ۔ ہندستان کے بڑھتے ہوئے کھیلوں کے منظرنامے پر روشنی ڈالتے ہوئے وزیر اعظم نے کھیلوں اور فٹنس کے کلچر کو فروغ دینے ، کھلاڑیوں کے لیے ادارہ جاتی حمایت مضبوط کرنے اور ملک بھر میں جدید تربیتی اور مقابلہ جاتی سہولیات کے مواقع فراہم کرنے کے حکومت کے عزم کا اعادہ کیا۔ ایکس پر اپنے پیغام میں وزیراعظم نے کہا کہ کھیلوں کے قومی دن کی مبارکباد! اس خاص موقع پر، ہم میجر دھیان چاند جی کو خراج عقیدت پیش کرتے ہیں، جن کی مہارت نسلوں کو متاثر کرتی رہے گی۔ گزشتہ دہائی میں، ہندستان کے کھیلوں کے منظر نامے میں قابل ذکر تبدیلی رونما ہوئی ہے ۔ نوجوان ٹیلنٹ کو پروان چڑھانے والے زمینی سطح کے پروگراموں سے لے کر عالمی معیار کی سہولیات کی تخلیق تک، ہم اپنے ملک میں کھیلوں کے ایک متحرک ایکو سسٹم کا مشاہدہ کر رہے ہیں۔
ہماری حکومت کھلاڑیوں کی حمایت، بنیادی ڈھانچے کی تعمیر اور ہندستان کو کھیلوں کی مہارت کا عالمی مرکز بنانے کے تئیں پرعزم ہے ۔’’
