ملبورن،28 دسمبر (یو این آئی ) انگلینڈ کے کپتان بین اسٹوکس کا کہنا ہے کہ اگر ایم سی جی جیسی پچ دنیا کے کسی دوسرے حصے میں دی جاتی تو کہرام مچ جاتا۔ انگلینڈ کی ٹیم نے آسٹریلیا میں جاری ایشز سیریز کا چوتھا میچ محض دو دن میں جیت لیا۔ آخری بار 1912 کی ایشز سیریز میں ایک سے زیادہ ایسے ٹسٹ میچز ہوئے تھے جو دو دن میں ختم ہوگئے۔ آسٹریلیا نے مجموعی طور پر دو دن تک جاری رہنے والے صرف چار ٹسٹ میچز کی میزبانی کی ہے ، جن میں دو رواں سیریز میں پیش آئے۔ پورے میچ میں پچ میں موجود سِیم کی وجہ سے بیاٹرز کو مشکلات کا سامنا رہا اور آسٹریلیا میں 1932 کے بعد سے یہ پہلا ٹسٹ ہے جس میں کوئی بیاٹر 50 رنز اسکور نہیں کر سکا۔ میچ کے بعد گفتگو میں انگلش کیپٹن اسٹوکس نے بے باکی کے ساتھ اپنے خیالات کا اظہار کیا۔ اسٹوکس نے کہا کہ یہ میچ وہ نہیں ہوا جو آپ چاہتے ہیں۔ آپ ایسا گیم نہیں چاہتے جو دو دن سے کم وقت میں ختم ہوجائے۔ لیکن ایک بار گیم شروع ہوجائے تو کچھ نہیں کیا جاسکتا ہے ۔ انہوں نے کہا کہ انہیں اتنا یقین ہے کہ اگر یہ دنیا میں کسی اور جگہ ہوا ہوتا تو واویلا مچ جاتا۔ یہ اس کھیل کیلئے اچھی چیز نہیں ہے، جس کو پانچ دن تک جاری رہنا چاہئے۔