ممبئی ، 28 نومبر (یو این آئی) بالی ووڈ فلمساز و اداکار فرحان اختر کی فلم 120 بہادر دہلی میں ٹیکس فری ہوگئی ہے ۔ فلم 120 بہادر حال ہی میں سینما گھروں میں ریلیز ہوئی ۔ اس سال کی سب سے زیادہ انتظار کی جانے والی فلموں میں سے ایک ، اس فلم کو میڈیا اور بالی ووڈ کی مشہور شخصیات دونوں کی طرف سے زبردست پذیرائی مل رہی ہے ۔ فلم کو دہلی میں ٹیکس فری کردیا گیا ہے ۔اس بات کا اعلان دہلی کی چیف منسٹر ریکھا گپتا نے کیا ۔ 120 بہادر ایک تاریخی جنگی فلم ہے جو1962 کی ہند-چین جنگ کے دوران ریزنگ لا کی جنگ میں بہادری سے لڑنے والے 13 کماؤں رجمنٹ کی چارلی کمپنی کے120 فوجیوں کی غیر معمولی ہمت ، قیادت اور قربانی کو خراج تحسین پیش کرتی ہے ۔یہ فلم میجر شیطان سنگھ بھاٹی کی متاثر کن قیادت کو اجاگر کرتی ہے ، جن کی حیرت انگیز بہادری اور عظیم قربانی نے ہندوستان کی فوجی تاریخ میں ہمت کی ایک انمٹ علامت قائم کی ہے ۔ ان بہادر سپاہیوں کو خصوصی خراج تحسین پیش کرنے کے لیے دہلی حکومت نے اس فلم کودہلی میں ٹیکس فری کرنے کا فیصلہ کیا ہے ۔
