ممتا بنرجی نے کتاب کی رائلٹی سے 5 لاکھ روپئے دیئے
کولکتہ۔3 مارچ (سیاست ڈاٹ کام) مغربی بنگال کی وزیر اعلی ممتا بنرجی نے منگل کو آل انڈین ترنمول کانگریس اعانتی فنڈ بنانے کا اعلان کیا ہے۔ تاکہ حال ہی میں دہلی میں ہوئے تشدد کے متاثرین کی بازآبادکاری میں مدد کی جاسکے۔ بتادیں کہ ممتا بنرجی نے دہلی تشدد کو منصوبہ بند قتل عام قرار دیا تھا۔ تشدد متاثرین کی بازآبادکاری کیلئے فنڈ بنائے جانے کی شروعات کا اعلان ممتابنرجی نے پیر کو اس وقت کیا تھا ، جب انہوں نے بنگلار گوربو ممتا (بنگال کی فخر ممتا ) مہم کی شروعات کی تھی۔ یہ ٹی ایم سی کی عوام تک رسائی کی ایک مہم ہے۔اس فنڈ میں پہلا عطیہ ترنمول کانگریس کی سربراہ اور مغربی بنگال کی وزیر اعلی ممتا بنرجی نے خود ہی کیا۔ ممتا نے اس فنڈ کیلئے اپنی کتاب سے ملی پانچ لاکھ روپے کی رائلٹی کی رقم عطیہ کی ہے۔ علاوہ ازیں پارٹی کے 35 اراکین پارلیمنٹ میں سے ہر ایک اس فنڈ میں 10 ، 10 ہزار روپے دیں گے۔ حالانکہ پارٹی فنڈ حاصل کرنے کے دیگر طریقوں پر بھی غور کررہی ہے اور اس کیلئے الگ الگ سطح پر کوششیں کی جارہی ہیں۔پیر کو ممتا بنرجی نے دہلی تشدد کو موثر طریقہ سے روکنے میں ناکامی پر مرکزی حکومت کی سخت تنقید کی تھی۔ انہوں نے نیتاجی انڈور اسٹیڈیم میں اپنی تقریر کے دوران مرکزی حکومت پر جم کر نشانہ سادھا تھا۔ وزیر اعلی ممتا بنرجی نے بی جے پی کو تشدد بھڑکانے کا ذمہ دار ٹھہرایا تھا۔ انہوں نے کہا تھا کہ ان کے ہاتھ میں ساری پولیس اور انٹلی جنس تھی ، انہوں نے ایسا کیوں ہونے دیا ۔