ممبئی، 26 نومبر (آئی اے این ایس) بالی ووڈ اداکارہ سوہا علی خان نے ملک میں بڑھتی فضائی آلودگی، خاص طور پر دہلی اور ممبئی میں ایر کوالٹی انڈیکس (اے کیوآئی) کے سنگین حد تک پہنچ جانے پر تشویش ظاہر کرتے ہوئے فوری حکومتی اور انتظامی اقدامات کا مطالبہ کیا ہے۔ سوہا نے انسٹاگرام اسٹوری پر آسمان کی ایک تصویر شیئر کی، جس پر انہوں نے ٹاکسک کا اسٹیکر لگایا۔ انہوں نے لکھا: ہوا کا معیاربدترین سطح پر ہے اور مسلسل بڑھ رہا ہے۔ ہم زہریلی ہوا میں سانس لے رہے ہیں۔ براہِ کرم فضائی آلودگی سے نمٹنے کے لیے کچھ نظامی تبدیلیاں نافذ کریں۔ ان کے اس بیان نے سوشل میڈیا پر شہریوں اور ماحولیاتی کارکنوں کی توجہ حاصل کی۔ دہلی میں صبح کے وقت انڈیا گیٹ اور کرتویہ پتھ کے علاقوں میں دھند اورکہر کی ہلکی تہہ چھائی رہی، جس سے حدِ نگاہ متاثر ہوئی۔ ایئر کوالٹی انڈیکس تقریباً 350 کے آس پاس ریکارڈ کیا گیا، جو ’انتہائی خراب‘ زمرے میں آتا ہے۔ مرکزی آلودگی کنٹرول بورڈ کے مطابق دہلی کا مجموعی معیار 337 رہا، جو گزشتہ روز کے مقابلے میں معمولی بہتری ضرور ظاہر کرتا ہے۔
