واشنگٹن : 23جولائی ( ایجنسیز ) امریکہ نے اقوام متحدہ کے ادارہ یونیسکو سے علیحدگی اختیار کرنے کا اعلان کردیا۔اسرائیل مخالف جذبات کا پرچار کرنے کا الزام لگا کر امریکہ نے اقوام متحدہ کے ادارے یونیسکو سے علیحدگی اختیار کرنے کا اعلان کیا ہے۔ترجمان امریکی محکمہ خارجہ ٹیمی بروس کا کہنا ہے کہ تعلیم، سائنس اور ثقافت سے متعلق اقوام متحدہ کی اس تنظیم یونیسکو میں شمولیت جاری رکھنا امریکہ کے قومی مفاد میں نہیں۔امریکہ کا دعویٰ ہے کہ یونیسکو سماجی اور ثقافتی سطح پر تفریق پیدا کرنے والی پالیسیوں کو بڑھاوا دیتا ہے۔ یہ ادارہ ایک ایسے نظریاتی ایجنڈے کا بھی پرچار کرتا ہے جو امریکہ فرسٹ خارجہ پالیسی سے متضاد ہے۔ترجمان نے واضح کیا کہ عالمی تنظیموں میں امریکی شرکت اس پالیسی پر مبنی ہوگی کہ امریکی مفادات کو پروان چڑھایا جائے۔یونیسکو سے امریکہ کی علیحدگی کا اطلاق 21 دسمبر 2026 سے ہوگا۔امریکہ نے اپنے فیصلے سے یونیسکو کی ڈائریکٹر جنرل آدرے آزولے کو باضابطہ طور پر آگاہ کردیا ہے۔
