غزہ، 26 اگست (یو این آئی) اسرائیلی مظالم کا حال دنیا کو بتانے والوں کے خواب بھی اسرائیلی حملوں نے اُجاڑ دیے ۔ غزہ کے النصر ہاسپٹل پر بمباری میں شہید ہونے والے الجزیرہ کے فوٹو جرنلسٹ محمد سلامہ چند دن بعد صحافی ہالا عصفور سے شادی کے بندھن میں بندھنے والے تھے ۔ لیکن اسرائیلی بمباری نے زندگی بھر ساتھ نبھانے کا خواب پورا نہ ہونے دیا ا وریہ ساتھ شروع ہونے سے پہلے ہی ہمیشہ کے بچھڑنے میں بدل گیا۔ صبر و ہمت کا پیکر بنی صحافی ہالا عصفور نے حوصلے سے زندگی کا ساتھی بننے والے کو سفر آخرت پر روانہ کیا۔ یاد رہے کہ اسرائیلی فوج نے گزشتہ روز غزہ کے النصر ہاسپٹل کو نشانہ بنایا اور اس حملے میں ڈیوٹی پر موجود 5 صحافیوں سمیت 20 افراد کی شہادت ہوئی۔ شہید ہونے والے صحافیوں میں الجریزہ کے فوٹو جرنلسٹ محمدسلامہ، غیرملکی خبرایجنسی رائٹرز کے کیمرامین حسام المصری، امریکی خبرایجنسی ایسوسی ایٹڈپریس اور برطانوی اخبار دی انڈیپینڈنٹ کے نامہ نگار مریم ابودقہ، امریکی ٹی وی این بی سی نیٹ ورک کے صحافی ابوطحٰہ اور قدس نیوز کے احمد ابو عزیز شامل تھے ۔
