امت مسلمہ سے مدد کی اپیل، دوحہ میں حماس قائدین سے ملاقات
دوحہ : جمعیت علما اسلام (جے یو آئی۔ف) کے سربراہ مولانا فضل الرحمن نے دوحہ میں فلسطینی مزاحمتی تحریک حماس کے رہنماؤں خالد مشعل اور اسماعیل ہنیہ سے ملاقات کی ہے۔ ترجمان جے یو آئی (ف) کے مطابق مولانا فضل الرحمن نے حماس کے قائدین سے مسئلہ فلسطین پر تفصیلی بات چیت کی ہے۔اس موقع پر اسماعیل ہنیہ نے کہا کہ انسانی حقوق کے دعویدار ممالک ہتھیاروں سے بھرے جہاز لے کر تل ابیب پہنچ رہے ہیں، امت مسلمہ کا فرض ہے کہ وہ اسرائیلی مظالم کے خلاف متحد ہو جائے۔ امت مسلمہ بھی فلسطینیوں کی حمایت کیلیے میدان میں نکلے۔حماس کے رہنما خالد مشعل کا کہنا تھا کہ فلسطین پر عرصہ دراز سے مظالم انسانی حقوق کے دعویداروں کے منہ پر طمانچہ ہے۔سربراہ جے یو آئی مولانا فضل الرحمن نے کہا کہ ترقی یافتہ ممالک کی حکومتوں کے ہاتھ معصوم بچوں اور خواتین کے خون سے رنگے ہوئے ہیں، وقت آگیا ہے کہ امت مسلمہ عملی میدان میں فلسطینی بھائیوں کے شانہ بشانہ کھڑی ہو۔انہوں نے کہا کہ اسرائیل فلسطین میں مظالم سے قبلہ اول کو ہیکل میں بدلنے کی مذموم کوشش کر رہا ہے۔ فلسطینی صرف اپنی زمین نہیں، امت مسلمہ کی طرف سے قبلہ اول کی آزادی کی جنگ لڑ رہے ہیں۔ترکی کے صدر رجب طیب اردغان کے بشمول دیگر کئی مسلم ممالک کے قائدین نے بھی غزہ پر اسرائیل کی بمباری کو فوری روکنے اور جنگ سے متاثرہ فلسطینی عوام کیلئے غذا اور ادویہ کی فوری سربراہی کا پرزور مطالبہ کیا ہے۔