تل ابیب : اسرائیل کے پولیس چیف نے یروشلم میں فلسطینی صحافی شیرین ابو عاقلہ کے جنازے کے موقع پر اہلکاروں کے اقدامات کی تحقیقات کا حکم دے دیا ہے۔ اسرائیل کے داخلی سلامتی کے وزیر عمر بارلیف نے کہا کہ انہوں نے جامع تحقیقات کے لیے ایک پینل مقرر کیا ہے۔ الجزیرہ کی نامہ نگار ابو عاقلہ گزشتہ بدھ کو اسرائیلی فوجی آپریشن کی کوریج کے دوران ہلاک ہو گئی تھیں۔ جمعہ کو ان کی نماز جنازہ میں ہزاروں سوگواروں نے شرکت کی۔ ٹیلی وژن فوٹیج میں ابوعاقلہ کے تابوت لے جانے والے سوگواروں کے ایک ہجوم پر پولیس کو لاٹھی چارج اور مار پیٹ کرتے دیکھا گیا نیز فوٹیج میں پولیس کو سٹن گرنیڈ پھینکتے اور فلسطینی پرچم کو ہٹاتے ہوئے بھی دکھایا گیا۔ اسرائیلی پولیس کا کہنا ہے کہ فسادیوں نے اس تقریب کو سبوتاژ کرنے اور پولیس افسران کو نقصان پہنچانے کی کوشش کی۔
