سوشیل میڈیا پر تصویر وائرل کرتے ہوئے عربوں کو جھنجھوڑنے کی کوشش
حیدرآباد۔/31 اکٹوبر، ( سیاست نیوز) فلسطینیوں پر اسرائیلی مظالم کے خلاف دنیا بھر میں عوامی سطح پر ناراضگی کا اظہار کیا جارہا ہے لیکن عرب اور اسلامی ممالک کی خاموشی پر عوام سخت ناراض ہیں۔ سوشیل میڈیا میں بیت المقدس اور اس کے اطراف اسرائیلی بمباری سے تباہی کی تصویر کے ساتھ عربوں کو جوڑتے ہوئے یہ تاثر دینے کی کوشش کی گئی کہ عرب ممالک تباہی کا تماشہ دیکھ رہے ہیں۔ سوشیل میڈیا پر وائرل یہ تصویر خود اپنے آپ میں ایک کہانی بیان کررہی ہے۔ تصویر کو سوشیل میڈیا کے مختلف پلیٹ فارمس پر وائرل کرتے ہوئے عوام نے عرب ممالک کی خاموشی کو سخت تنقید کا نشانہ بنایا اور کہا کہ اگر عرب ممالک متحدہ طور پر فلسطین کی تائید کا فیصلہ کریں تو اسرائیل کی فلسطین کی طرف آنکھ اُٹھانے کی ہمت نہیں رہے گی۔ عوام کا تاثر ہے کہ عرب ممالک صرف زبانی ہمدردی اور مذمت تک محدود ہوچکے ہیں۔ تباہی و بربادی پر عرب حکمراں اسرائیل کے خلاف کارروائی کے بجائے اپنے روز کے معمولات اور سرگرمیوں میں مصروف ہیں۔ امید کی جارہی ہے کہ سوشیل میڈیا کی یہ مہم مزید شدت اختیار کرے گی۔
سعودی وزیر دفاع کی سرکاری دورہ پرامریکہ آمد
واشنگٹن : سعودی ولیعہد شہزادہ محمد بن سلمان کی ہدایت پر وزیر دفاع شہزادہ خالد بن سلمان ایک وفد کے ہمراہ پیر کو سرکاری دورے پر واشنگٹن پہنچے۔ شہزادہ خالد متعدد امریکی حکام سے ملاقاتیں کریں گے۔ دونوں دوست ملکوں کے درمیان دوطرفہ تعلقات، علاقائی و بین الاقوامی ایشوز اور مشترکہ دلچسپی کے امور پر تبادلہ خیال کیا جائے گا۔