نئی دہلی : 8 اگست (ایجنسیز) اداکارہ ہما قریشی کے بھائی آصف قریشی کو دہلی کے نظام الدین علاقہ میں پارکنگ کے تنازعہ پر رات دیر گئے جھگڑے کے دوران قتل کردیا گیا۔ پولیس کے مطابق دونوں ملزمین کو گرفتار کرکے قتل میں استعمال ہونے والا ہتھیار بھی برآمد کرلیا گیا ہے۔ یہ واقعہ جمعرات کی رات تقریباً 10 بجے پیش آیا جب آصف قریشی نے دو افراد سے درخواست کی کہ وہ اپنا اسکوٹر ان کے گھر کے مرکزی دروازے کے سامنے سے ہٹادیں۔ زبانی تلخ کلامی کے بعد دونوں وہاں سے چلے گئے لیکن دھمکی دی کہ واپس آئیں گے۔ آصف کی اہلیہ شاہین قریشی نے بتایا کہ چند منٹ بعد وہ شخص اپنے بھائی کے ساتھ واپس آیا اور تیز دھار ہتھیار سے آصف پر حملہ کردیا۔ میں نے اپنے دیور جاوید کو فون کیا لیکن اس وقت تک آصف کا بہت زیادہ خون بہہ چکا اور ان کی موت ہوگئی۔
آصف کو فوری طور پر مشرقی کیلاش کے نیشنل ہارٹ انسٹی ٹیوٹ لے جایا گیا جہاں ڈاکٹروں نے انہیں مردہ قرار دے دیا۔ شاہین کا کہنا تھا کہ ڈاکٹروں نے بتایا کہ ان کی موت کو دیڑھ گھنٹہ گزر چکا تھا۔ ان کا یہ بھی دعوی تھا کہ ملزمین اس سے پہلے بھی ان کے شوہر کو جان سے مارنے کی کوشش کرچکے تھے۔
