حقائق کو توڑ مروڑ کر پیش کرنے جئے رام رمیش کا الزام
نئی دہلی: کانگریس نے کہا ہے کہ بی جے پی کشمیری پنڈتوں کے اخراج کی ذمہ دار ہے اور چاہے وہ کتنا ہی ڈرامہ کیوں نہ کرے، وہ کشمیری پنڈتوں کو پہنچنے والے درد کی ذمہ داری سے نہیں بچ سکتی۔کانگریس پارٹی نے ٹوئٹ کیا کہ بی جے پی کشمیری پنڈتوں کے درد کی ذمہ دار ہے کیونکہ وہ اس وقت مرکز میں حکومت کی حمایت کر رہی تھی اور اس نے کشمیری پنڈتوں کیلئے کچھ نہیں کیا۔ اس دوران کانگریس لیڈر جے رام رمیش نے بھی کہا کہ کشمیری پنڈتوں کی حالت زار پر بنائی گئی فلم پروپیگنڈا ہے اور حقائق کو توڑ مروڑ کر تشدد کو فروغ دینے کی کوشش کی گئی ہے۔کانگریس نے اپنے آفیشل پیج پر ٹوئٹ کیا کہ کشمیری پنڈتوں کے نام پر بی جے پی جتنی مرضی سیاست کرلے، آنسو بہانے کا ڈھونگ کر لے، مگر اپنے گناہوں کو چھپا نہیں پائے گی۔ وی پی سنگھ حکومت میں اقتدار کے مزے لوٹنے والی بی جے پی کشمیری پنڈتوں کے درد کی ذمہ داری سے راہ فرار اختیار نہیں کرسکتی۔
