ممبئی ، 20 ڈسمبر (ایجنسیز) بالی ووڈ کی یادگار فلم ’3 ایڈیٹس‘ کے مداحوں کیلئے بڑی خبر سامنے آئی ہے۔ رپورٹس کے مطابق راجکمار ہیرانی اپنی اس مقبول فلم کے سیکوئل پر کام کر رہے ہیں، جس کا عارضی نام ’4 ایڈیٹس‘ رکھا گیا ہے۔ 2009 کی بلاک بسٹر فلم کے بعد اب کہانی کو ایک قدم آگے بڑھانے کی تیاری ہے۔ اس بار پروڈکشن ٹیم صرف پرانی کہانی کو آگے بڑھانے پر اکتفا نہیں کرے گی بلکہ ایک نیا مرکزی کردار بھی متعارف کروانے کا ارادہ رکھتی ہے، جسے فلم میں ’’چوتھا ایڈیٹ‘‘ کہا جا رہا ہے۔ اس وقت اسکرپٹ پر کام جاری ہے اور فلم کا نام ابھی قطعی نہیں، تاہم میکرز چاہتے ہیں کہ فرنچائز کو مزید بڑا اور دلچسپ بنایا جائے۔ اسی مقصد کیلئے کسی بڑے سوپر اسٹار کو کاسٹ کرنے کی تلاش بھی جاری ہے، تاکہ اصل تین کرداروں کے ساتھ ایک نیا مضبوط کردار شامل کیا جا سکے۔ یہ سیکوئل پہلی فلم کی کہانی کو وہیں سے آگے بڑھائے گا جہاں وہ ختم ہوئی تھی، لیکن ساتھ ہی کچھ نئے عناصر بھی شامل ہوں گے تاکہ چوتھے مرکزی کردار کی شمولیت کو بھرپور انداز میں جواز دیا جا سکے۔ واضح رہے کہ ’3 ایڈیٹس‘ میں عامر خان، آر مادھون، شرمن جوشی اور کرینہ کپور خان نے مرکزی کردار ادا کئے تھے۔ فلم نہ صرف باکس آفس پر تقریباً 200 کروڑ روپے کمانے میں کامیاب رہی بلکہ وقت کے ساتھ ایک کلٹ کلاسک بھی بن گئی۔ شائقین کی خوشی کیلئے اصل تینوں اداکار ایک بار پھر اپنے کرداروں میں نظر آسکتے ہیں، جبکہ ’’چوتھا ایڈیٹ‘‘ کون ہوگا، اس پر سسپنس برقرار ہے۔