کشمیرکے ڈوڈہ میں دردناک حادثہ، 11 دیگر زخمی
سرینگر۔22؍جنوری ( ایجنسیز)جموں و کشمیر کے ڈوڈہ میں ایک خوفناک حادثہ پیش آیا ہے جس میں کم از کم 10 جوان شہید ہو گئے ہیں۔ میڈیا رپورٹس کے مطابق علاقہ سے گزرتے ہوئے فوج کی ’کیسپر‘ گہری کھائی میں گر گئی جس کی وجہ سے 4 جوانوں کی شہادت ہوگئی تھی اور اب شہید جوانوں کی تعداد بڑھ کر 10 ہو گئی ہے۔ اس حادثہ میں 11 دیگر جوان زخمی بھی ہوئے ہیں ۔ فوج کا یہ کیسپر ڈوڈہ میں بھدرواہ چمبا روڈ سے گزر رہا تھا، جس کی حالت پہلے سے ہی کافی خستہ بتائی جا رہی ہے۔خبروں میں بتایا جا رہا ہے کہ کیسپر تقریباً 400 فیٹ گہری کھائی میں گر گئی ۔ زخمی فوجیوں کو کھائی سے نکال کر قریبی میڈیکل سنٹرل میں لے جایا گیا جہاں 3 فوجیوں کی حالت سنگین بتائی جا رہی ہے۔فوج کی جو گاڑی کھائی میں گری ہے اس میں تقریباً 2 درجن جوان سوار تھے جو ایک اونچی پہاڑی پوسٹ کی طرف جا رہے تھے۔ غالباً کسی وجہ سے ڈرائیور نے گاڑی پر اپنا کنٹرول گنوا دیا اور وہ سڑک سے پھسل کر کھائی میں جا گری۔ غور کرنے والی بات یہ ہے کہ جموں و کشمیر کے ڈوڈہ ضلع میں سیکورٹی کی صورت حال موجودہ وقت میں حساس ہے۔ یہاں حالیہ دنوں میں دہشت گردانہ سرگرمیوں اور سیکورٹی فورسز کے آپریشن بڑھے ہوئے ہیں۔ خفیہ رپورٹس کے مطابق ڈوڈہ اور کشتواڑ میں 30 سے 35 پاکستانی نژاد دہشت گرد فعال ہو سکتے ہیں جو جنگل میں چھپے ہوئے ہیں۔وزیر اعظم مودی اور مختلف جماعتوں کے قائدین نے ڈوڈا حادثہ پر گہرے دکھ کا اظہار کیا اور مہلوکین کے ورثاء سے تعزیت کا اظہار بھی کیا گیا۔
