لندن۔21 اگسٹ (سیاست ڈاٹ کام ) ہنڈراس میں فٹبال اسٹیڈیم جنگ کا میدان بن گیا۔ تماشائیوں ، مخالفین اور پولیس کے درمیان تصادم کے نتیجہ میں چار افراد ہلاک ہو گئے جبکہ متعدد زخمی ہو گئے۔تفصیلات کے مطابق ٹیگوسیگالپا میں فٹبال کے روایتی حریف اولمپیا اور موٹاگوآ کے درمیان میچ مقرر تھا۔شائقین آپے سے باہر ہو گئے، ٹیموں سے پہلے پِچ پر ڈیرے جما لیے، دھینگا مشتی اور مارا ماری نے فٹبال گراؤنڈ کو میدان جنگ بنا دیا اس دوران چار افراد زندگی کی بازی ہار گئے جبکہ متعدد زخمی ہو گئے۔ مشتعل افراد پر پولیس بھی ٹوٹ پڑیجس کے بعد میچ منسوخ کر دیا گیا۔ حکام نے کہا ہے کہ لڑائی کی وجہ اولمپیا ٹیم کی جانب سے موٹاگوآ کے کھلاڑیوں کی بس پر پتھراؤ کیا جس کے باعث تین کھلاڑی زخمی ہو گئے، زخمی ہونیوالوں میں ایمیلیو، روبرٹو، جوناتھن روگر شامل ہیں۔ لڑائی اس وقت شروع ہوئی جب ہوائی فائرنگ کی آواز سنائی دی گئی۔ لڑائی اس قدر بڑھ گئی تھی کہ پولیس کو آنسوگیس استعمال کرنا پڑا اس دوران متعدد زخمی بھی ہوئے، ہسپتال ذرائع نے کہا ہے کہ ہمارے پاس چار افراد کی نعشیں لائی گئی ہیں جبکہ مزید تین کی حالت کافی تشویش ناک ہے۔ پولیس نے دعویٰ کیا ہے کہ لڑائی کی وجہ بننے والے اور ہوائی فائر کرنے والے شہری کو گرفتار کر لیا ہے اور اسے جیل بھیج دیا گیا ہے۔
