ممبئی :این سی پی کی رکن پارلیمنٹ سپریا سولے نے مہاراشٹرا نو نرمان سینا کے سربراہ راج ٹھاکرے پر سخت تنقید کی ہے۔ انہوں نے چھتر پتی شیواجی کے حوالے سے شرد پوار پر راج ٹھاکرے کے دیئے گیے بیان پر یہ سخت ریمارک کیا ہے۔ سولے نے کہا کہ شرد پوار کا نام لئے بغیر انہیں پبلسٹی نہیں مل پاتی ہے۔ راج ٹھاکرے کے ساتھ انہوں نے مہاراشٹر اکے نائب وزیر اعلیٰ دیویندر فڑنویس کو بھی اپنی تنقید کا نشانہ بنایا اور کہا کہ سرخیوں میں رہنے کیلئے راج ٹھاکرے اور دیویندر فڑنویس دونوں شرد پوار کے خلاف بیانات دیتے ہیں۔واضح رہے کہ ایم این ایس سربراہ راج ٹھاکرے نے شرد پوار پر تنقید کرتے ہوئے کہا تھا کہ شرد پوار اپنی تقاریر میں چھترپتی شیواجی مہاراج کا نام لینے سے گریز کرتے رہے ہیں کیونکہ شاید انہیں یہ بڑی فکر تھی کہ ان کا نام لینے سے مسلمانوں کا ووٹ بینک متاثر ہو گا لیکن اب وہ چھترپتی شیواجی مہاراج کی بات کر رہے ہیں۔راج ٹھاکرے کے اس بیان پر ان کی بیٹی سپریا سولے نے اپنے والد شرد پوار کا دفاع کرتے ہوئے کہا کہ راج ٹھاکرے اور دیویندر فڑنویس سرخیاں بٹورنے کے لیے شرد پوار کے خلاف بیانات دیتے ہیں۔ درحقیقت رائے گڑھ قلعے میں مہاراشٹر اکی سیاست کے قد آور لیڈر شرد پوار کی سربراہی والی این سی پی نے ہفتہ 24 فروری کو اپنی پارٹی کا نیا انتخابی نشان ’توتاری بجاتا آدمی‘ لانچ کیا تھا۔ اس دوران انہوں نے چھترپتی شیواجی کے بہتر حکمرانی کا ذکر کیا تھا۔