ریاض ( کے این واصف) مہاراشٹرا اسٹیٹ ہندی ساہتیہ اکیڈیمی ممبئی کی جانب سے اردو و ہندی کے مقبول مزاج نگار ڈاکٹر فیاض احمد فیضی کو ان کی تصنیف ’ پھلوں میں رنگ بھرے‘ کو ایوارڈ ۔ ہندی ساہتیہ اکیڈیمی کے جاریہ اعلامیہ کے مطابق فیاض فیضی کو سال 2023-24 ایوارڈ کے لئے منتخب کیا گیا ہے ۔ فیضی کو ’’ آچاریہ رام چندر شکلا ایوارڈ‘‘ 18مارچ کو 2025 ممبئی میں پیش کیا جائے گا ، جہاں انہیں 25000/- روپئے ، سپاس نامہ و تمغہ پیش کیا جائے گا ۔ اردو اور ہندی کے کہنہ مشق مزاح نگار فیاض احمد فیضی 24فبروری 1954 کو ممبئی میں پیدا ہوئے ۔ اردو و فارسی میں ماسٹرز کے بعد فیضی نے 2015ء میں اردو طنز و مزاح کے ارتقاء میںا ودھ بنچ اور شگوفہ کا حصہ کے عنوان پر مقالہ پیش کر کے ممبئی یونیورسٹی سے پی ایچ ڈی کی ڈگری حاصل کی ۔ ممبئی میں بینک منیجر کے عہدہ پر فائز رہے ۔فیاض فیضی نے 1975 میں مزاح نگاری کی ابتداء کی ۔ آپ کے اب تک طنز و مزاح کے چار مجموعے شائع ہوکر منظر عام پر آچکے ہیں ۔ آپ ماہنامہ ’’ شگوفہ ‘‘ کے علاوہ ہند و پاک کے معتبر و معروف جرائد و رسائل میں پابندی سے شائع ہوتے ہیں ۔ آپ زندہ دلان حیدرآباد کی سالانہ تقریب میں بھی پابندی سے مدعو کئے جاتے ہیں ۔
