فیروزآباد: اترپردیش کے ضلع فیروزآباد کے شکوہ آباد علاقے کے گاؤں کشن پور میں اسکولی بچوں کی آپس میں ہوئی لڑائی میں زخمی جماعت دو کے طالب علم کی منگل کو موت ہوگئی۔ اہل خانہ نے ہم جماعتوں پر مارپیٹ و ٹیچروں پر لاپرواہی کا الزام لگایا ہے ۔ اہل خانہ نے اسکول کے باہر بچے کی لاش کو رکھ کر انصاف کا مطالبہ کیا ہے ۔ متاثرہ خاندان نے تھانے میں معاملے کی شکایت کی ہے ۔ پولیس معاملے کی جانچ کررہی ہے ۔ پولیس ذرائع نے بتایا کہ شکوہ آباد کے کشن پور باشندہ ویریندر سنگھ کا بیٹا شیوم عرف سوم(10)گاؤں کے پرائمری اسکول میں جماعت دوم کا طالب علم تھا۔ اہل خانہ کا الزام ہے کہ پیر کو بچہ اسکول گیا تھا۔ لنچ کے بعد بچوں میں جھگڑا ہوا۔ جھگڑے کے دوران کچھ بچے اس کی چھاتی پر کو د گئے جس سے اس کی حالت بگڑ گئی۔ طالب علم کو اسپتال میں داخل کرایا گیا۔
