لکھنو۔18 نومبر (سیاست ڈاٹ کام ) افغانستان نے ٹی ٹوئنٹی کی عالمی چمپیئن ویسٹ انڈیز کو تین میچوں کی سیریز کے آخری اور فیلصہ کن میچ میں شکست دے کر سیریز 2-1 سے اپنے نام کرلی۔ لکھنو میں کھیلے گئے سیریز کے آخری میچ میں افغانستان نے بہترین کھیل کا مظاہرہ کرکے ٹی ٹوئنٹی کی مضبوط ٹیم ویسٹ انڈیز کو باآسانی شکست دے دی۔ افغان ٹیم کے نوجوان کپتان راشد خان نے ٹاس جیت کر پہلے خود بیٹنگ کا فیصلہ کیا تو بیٹسمینوں نے اسکور بورڈ پر 156 رنز کا معقول اسکور سجادیا حالانکہ حضرت اللہ زازئی اورکریم جنت صرف 12 کے مجموعی اسکور پر پویلین لوٹ گئے تھے۔وکٹ کیپر رحمٰن اللہ گربز نے شان دار بیٹنگ کا مظاہرہ کرتے ہوئے افغان ٹیم کو تن تنہا قابل دفاع اسکور تک پہنچایا۔ ابراہیم زدران صرف ایک رن بنا کر آوٹ ہوئے تھے تاہم اصغر افغان نے 24 رنز بنا کر رحمٰن اللہ کا ساتھ دیا جس کے بعد نجیب اللہ نے 14، محمد نبی نے 15 رنز بنائے اور راشد خان صفر پر آوٹ ہوئے۔ رحمٰن اللہ نے سب سے زیادہ 79 رنز بنائے اورکیرن پولارڈکی گیند پر آوٹ ہوئے تاہم انہوں نے 6 چوکوں اور 5 چھکوں کی مدد سے 52 گیندوں پر بہترین اننگز کھیلی۔افغانستان نے مقررہ اوورز میں 8 وکٹوں پر 156 رنز بنائے۔ ویسٹ انڈیز کی جانب سے کوٹریل، ولیمز اور پاول نے فی کس2 وکٹیں حاصل کیں۔ افغانستان جیسی نووارد ٹیم کے خلاف ہدف کے تعاقب میں سوائے شائی ہوپ کے ویسٹ انڈیز کے دیگر بیٹسمین جم کر کھیل نہ سکے اور مسلسل آوٹ ہوتے رہے۔ ویسٹ انڈیز کے تجربہ کار بیٹسمین لینڈل سمنز7 اور نوجوان بلے باز برینڈن کنگ صرف ایک رن بنا کر آوٹ ہوئے تاہم لیوس نے 24 رنز بنائے۔ ہوپ نے سب سے زیادہ 52 رنز بناتے ہوئے ٹیم کی امید کو برقرار رکھا تاہم اس اسکو کیلئے انہوں نے 46 گیندوں کا سامنا کیا، 3 چوکے اور ایک چھکا رسید کیا لیکن دوسرے سرے سے برق رفتاری سے ان کا ساتھ دینے والے کوئی نہیں تھا۔ ویسٹ انڈیز نے افغان بولروں کے سامنے مقررہ اوورز میں7 وکٹوں پر 127 رنز بنائے اور میچ 29 رنز سے گنوادیا۔ افغانستان کی جانب سے نوین الحق نے 3 وکٹیں حاصل کیں اور راشد خان نے بہترین بولنگ کی تاہم انہیں ایک وکٹ مل سکی۔ رحمٰن اللہ گربز کو شان دار بیٹنگ پر میچ اور کریم جنت کو سیریز کا بہترین کھلاڑی قرار دیا گیا۔ خیال رہے کہ ونڈے سیریز میں ویسٹ انڈیز نے کامیابی حاصل کی تھی۔
