ریاض9 نومبر ( سیاست ڈاٹ کام ) سعودی محکمہ پاسپورٹ کے مطابق فیملی ویزٹ ویزے کی مدت ختم ہونے پر کوئی مہلت نہیں دی جاسکتی۔ جس دن ویزے کی معیاد ختم ہورہی ہوگی وہ ملک میں قیام کا آخری دن ہوگا،اس روز فیملی ویزٹ پر آنے والے کو سفر کرنا ہوگا۔ اس کے بعد قیام غیر قانونی شمار ہوگا۔تفصیلات کے مطابق محکمہ پاسپورٹ سے ٹوئٹر اکاؤنٹ پر استفسار کیا گیا تھا کہ کیا فیملی ویزٹ کی مدت ختم ہونے پر آنے والے کو 3 دن کی مہلت دی جاتی ہے یا نہیں؟محکمہ نے اس کے جواب میں کہا کہ ویزٹ ویزے پر آنے والے کو ویزے کی مدت کے آخری دن سفر کرنا ہوگا۔ میعاد کے بعد کوئی مہلت نہیں دی جاسکتی۔واضح رہے کہ سعودی عرب میں مقیم لاکھوں تارکین وطن اپنے عزیز و اقارب خصوصاً اہلیہ اور بچوں کو ویزٹ ویزوں پر بلاتے ہیں۔بعض اوقات ٹکٹ نہیں مل پاتی، اکثر صحت یا کچھ گھریلو مسائل ہوجاتے ہیں جس کی وجہ سے سفر مشکل ہوجاتا ہے۔ بعض تارکین یہ سوچ کر کہ ویزے کی میعاد ختم ہونے کے 3 دن کے اندر انہیں سیٹ مل رہی ہے تو ریزرویشن کروا لیتے ہیں اور سمجھتے ہیں کہ ایسا کرنے کی صورت میں ان سے کوئی باز پرس نہیں ہوگی۔محکمہ پاسپورٹ نے اس امکان کی تردید کردی ہے اور واضح کیا ہے کہ میعاد کے آخری دن تک سفر کرنا ہوگا۔