شہر اور اضلاع سے خصوصی بسوں کا انتظام، گلوبل سمٹ کے فوری بعد مشاہدے کی سہولت
حیدرآباد۔ 23 نومبر (سیاست نیوز) تلنگانہ حکومت نے فیوچر سٹی کے قیام کی تفصیلات سے عوام کو واقف کرانے کے لئے 8 اور 9 ڈسمبر کو گلوبل سمٹ کے اختتام کے بعد 10 تا 12 ڈسمبر فیوچر سٹی کو عوام کے لئے کھولنے کا فیصلہ کیا ہے۔ ریاست میں سرمایہ کاری میں اضافے اور قومی اور بین الاقوامی اداروں کے قیام کے لئے حکومت نے فیوچر سٹی کے قیام کی تیاریوں کو تیز کردیا ہے۔ عالمی سطح پر فیوچر سٹی کی خصوصیات کی تشہیر کے لئے تلنگانہ رائزنگ 2047 گلوبل سمٹ 8 اور 9 ڈسمبر کو منعقد ہوگا جس میں دنیا بھر کے نامور اداروں کے نمائندے شرکت کریں گے۔ حکومت نے فیصلہ کیا ہے کہ گلوبل سمٹ کے بعد 10 تا 12 ڈسمبر فیوچر سٹی کو عوام کے مشاہدہ کے لئے کھول دیا جائے گا۔ عوام فیوچر سٹی کا تفصیلی طور پر دورہ کرتے ہوئے ریاست کی طویل مدتی ترقیاتی منصوبہ کا جائزہ لے سکتے ہیں۔ عوام کے مشاہدہ کے لئے حیدرآباد اور ضلع ہیڈکوارٹر سے آر ٹی سی خصوصی بسوں کے انتظام کا جائزہ لیا جارہا ہے۔ ریاستی وزراء اور سینئر عہدیدار عوامی مشاہدہ کی سہولتوں کو قطعیت دے رہے ہیں۔ انڈین اسکول آف بزنس کو ذمہ داری دی گئی ہے کہ وہ تلنگانہ رائزنگ ڈاکومنٹ تیار کریں۔ پرجابھون میں وار روم قائم کیا گیا ہے۔ امید کی جارہی ہے کہ دنیا بھر سے 2000 مندوبین شرکت کریں گے۔ سمٹ کے فوری بعد عوام کو مشاہدہ کی سہولت کا مقصد ریاست کی ترقی کے لئے حکومت کے اقدامات سے آگاہ کرنا ہے۔ 1
