دوحہ : قطر میں آئندہ ماہ شروع ہونے والے فٹ بال ورلڈ کپ میں لاکھوں شائقین کیلئے کورونا وائرس ویکسینیشن کی شرط ختم کردی گئی ہے۔ گلف نیوز کے حوالے سے میڈیا رپورٹ میں بتایا گیا کہ قطر کی وزارت صحت نے کہا ہے کہ اگر کورونا کے کیسز میں دوبارہ اضافہ ہوا تو کھلاڑیوں اور میچ انتظامیہ کو ’بائیو ببل‘ میں رہنے پر مجبور کیا جاسکتا ہے جبکہ خلاف ورزی کرنے والوں کو ٹورنمنٹ سے باہر کیا جاسکتا ہے۔ عہدیداروں نے تسلیم کیا کہ ورلڈ کپ میں ایسے کھلاڑی بھی ہوں گے جو ویکسین لگانے سے انکار کر چکے ہیں۔ انگلینڈ کی پریمیئر لیگ نے رواں سال کہا تھا کہ 15 فیصد کھلاڑیوں نے ویکسین لینے سے انکار کر دیا ہے۔ 2019 میں کورونا وبا پھیلنے کے بعد 29 روزہ فیفا ورلڈ کپ ٹورنمنٹ شائقین کیلئے پہلا بڑا عالمی ایونٹ ہوگا۔ قطر میں فٹ بال کے عالمی مقابلے 20 نومبر کو شروع ہوں گے۔ عالمی وبا کی وجہ سے دنیا بھر میں 60 لاکھ سے زائد افراد فوت ہوگئے تھے۔ قطری منتظمین نے توقع ظاہر کی ہے کہ 10 لاکھ سے زائد شائقین اس ایونٹ میں شرکت کریں گے۔ فٹ بال کی عالمی گورننگ باڈی فیفا نے کہا کہ یہ میگا ایونٹ ہوگا جو اس بات کی علامت ہوگا کہ دنیا سے کوویڈ کی شرح میں کمی آگئی ہے۔ ہیلتھ گائیڈ لائنز کے مطابق 6 برس سے زائد عمر کے شائقین فٹ بال کو قطر کی پرواز میں سوار ہونے سے قبل کورونا وائرس ٹسٹ منفی آنے کی رپورٹ دکھانی ہوگی۔ قطری وزارت صحت نے کہا کہ کورونا کی صورت حال فی الحال کنٹرول میں ہے، اس لئے شائقین کیلئے ویکسینیشن کی لازمی شرط ختم کردی گئی ہے۔ قطر کی سپریم کمیٹی کے مطابق شائقین کو پبلک ٹرانسپورٹ میں ماسک پہننا لازمی ہوگا لیکن حکام کی جانب سے دوحہ کے 8 اسٹیڈیمز میں (جہاں میچ کھیلے جائیں گے) بھی ماسک کے استعمال کی سفارش کی گئی ہے۔ وزارت صحت کے رہنما اصولوں کے مطابق قطر میں کورونا کا شکار ہونے والے افراد کو قرنطینہ کیا جائے گا۔ وزارت صحت کے اعدادو شمار کے مطابق قطر میں کوویڈ ۔ 19سے 4,40,000 سے زائد شہری متاثر ہوئے جبکہ 692 شہریوں کی اموات درج ہوئیں۔ قطر کی آبادی 2 کروڑ 8 لاکھ ہے۔ 26 سے 27 نومبر کے دوران دوحہ میں تقریباً 3 لاکھ 50 ہزار شائقین کی آمد متوقع ہے۔ دوحہ ائیرپورٹ اور سڑکوں میں شدید ہجوم کا بھی امکان ہے۔ یکم نومبر سے صرف ان شائقین کو داخلے کی اجازت ہوگی جن کے پاس فیفا میچ کے ٹکٹ ہوں گے جبکہ ایک ٹکٹ کے ساتھ 3 افراد کو آنے کی اجازت ہوگی۔ قطر آنے والے شائقین کے پاس خصوصی فیان پاس، حایا کارڈ اور قطر کی کوویڈ ہیلتھ ایپلیکیشن ’اہتراض‘ لازمی طور پر موجود ہونی چاہئے۔ فیفا کے مطابق 32 ورلڈ کپ ٹیموں کے کھلاڑی، عملے اور میچ انتظامیہ کو ہر دو روز کے بعد ’اینٹی جن‘ ٹسٹ کروانے ہوں گے۔
