نئی دہلی، 12 مارچ (یو این آئی) قومی راجدھانی میں ایل پی جی گیس کی عدم دستیابی سے ریستوراں اور خورد ونوش کے ڈھابے بھی متاثر ہو رہے ہیں۔ نئی دہلی کے کناٹ پلیس میں واقع معروف ریستوراں نے ایک نوٹس جاری کیا ہے جس میں صارفین کو مطلع کیا گیا ہے کہ گیس سلنڈر کی عدم دستیابی کی وجہ سے مینو کو محدود کیا گیا ہے ۔ کناٹ پلیس میں کھانے پینے کے مشہور ڈھابے نے کھانے پینے کی جگہ اور کاؤنٹر پر ایک پوسٹر لگایا ہے ، جس میں لکھا ہے ،صرف راجما چاول اور کڑھی چاول ہی پیش کیے جائیں گے کیونکہ فی الحال گیس سلنڈر دستیاب نہیں ہیں۔ دکان کے مالک سوربھ مہتا نے کہا کہ دکان میں رسوئی گیس کا محدود ذخیرہ ہے ، جو دو سے چار دن تک چل سکتا ہے ۔ سوربھ مہتا نے کہا کہ ہمارے پاس بہت کم اسٹاک بچا ہے ۔ اگر ہم مزید گیس سلنڈروں کا بندوبست کر سکتے ہیں، تو دکان چلتی رہے گی۔ ورنہ، ہمیں عارضی طور پر ڈھابے کو بند کرنا پڑ سکتا ہے ۔
