متعلقہ اضلاع کے کلکٹروں کے ہمراہ ریاستی سکریٹری برائے محکمہ عمارت و شوارع کی ویڈیو کانفرنس
پداپلی۔ قومی شاہراہ کی تعمیر کیلئے اراضی کے سروے کا عمل فوری طور پر مکمل کرنے کی ریاستی سکریٹری برائے محکمہ عمارت و شوارع شرینواس راجو نے متعلقہ عہدیداروں کو ہدایت دی۔ قومی شاہراہ کی تعمیر کے لئے اراضی کے حصول کے عمل پر متعلقہ ضلع کلکٹروں کے ہمراہ انھوں نے ویڈیو کانفرنس کا انعقاد عمل میں لایا۔ اس اجلاس سے خطاب کرتے ہوئے انھوں نے کہا کہ بھوپال پلی جئے شنکر ضلع سے رنگا ریڈی ضلع تک تعمیر کی جانے والی نئی قومی شاہراہ کے لئے درکار اراضی کے حصول کے تحت اراضی کے سروے کا عمل فوری تکمیل کیا جائے۔ضلع واری سطح پر اراضی کے حصول کی پیشرفت سے متعلق انھوں نے عہدیدیداروں سے تفصیلات دریافت کیں۔اس کانفرنس میں شریک ضلع کلکٹر پداپلی ڈاکٹر سنگیتا ستیہ نارائنا نے کہا کہ نئی تعمیر ہونے والی قومی شاہراہ پداپلی ضلع میں 38.07 کیلو میٹر طویل ہوگی، جس کیلئے منتھنی، راماگری، متارم منڈلوں کے 16 مواضعات کے حدودو میں 493 ایکر اراضی کا حصول درکارہے۔اس ضمن میں 13 مواضعات میں اراضی سروے کا عمل مکمل ہوچکا ہے، 3 مواضعات (مْتارم، کیشاپٹنم، آدیوارم پیٹ) میں سروے کے دوران کسانوں کے احتجاج پر متعلقہ کسانوں سے راست طور پر بات چیت کی گئی اور جلد ازجلد اراضی سروے کا عمل مکمل کیا جائے گا۔ ریاستی سکریٹری نے مطلع کیا کہ قومی شاہراہوں کی تعمیر پر حکومت کی جانب سے بنیادی ترجیح دی جارہی ہے۔ اس پس منظر میں عاجلانہ طور پر کاموں کی تکمیل کو یقینی بنایا جائے۔ حکومت کی جانب سے طئے کردہ وقت مقررہ تک اراضی کے حصول کیلئے لائحہ عمل تیار کرنے کی عہدیداروں کو انھوں نے ہدایت دی۔اس ویڈیو کانفرنس میں ضلع ایڈیشنل کلکٹر لکشمی نارائنا، منتھنی ریوینو ڈویڑن آفیسر کے۔ نرسمہا مورتی، ڈی سکشن سپریٹنڈنٹ دتّو پرساد، سندیپ ریڈی، متعلقہ عہدیداران وغیرہ نے شرکت کی۔
