رانچی :۔ چارہ گھوٹالہ کیس میں سزا یافتہ اور رانچی کے رمز میں علالت آر جے ڈی سپریمو لالو پرساد یادو کے علاج کررہے ڈاکٹر امیش پرساد نے آج بتایا کہ لالو پرساد یادو کی طبیعت کبھی بھی خراب ہوسکتی ہے کیوں کہ ان کے گردے محض 25 فیصد ہی کام کررہے ہیں ۔ ڈاکٹر رمیش پرساد نے کہا کہ لالو پرساد کی حالیہ جانچ رپورٹ کو دیکھنے کے بعد یہ کہا جاسکتا ہے کہ ان کا گردہ صرف 25 فیصد ہی کام کررہا ہے ۔ ایسی صورتحال میں انہیں ڈالیسیز کی بھی ضرورت پڑسکتی ہے یا باہر بھیجنے کی بھی ضرور پڑ سکتی ہے کیوں کہ گردے کے مریضوں کے لیے بہتر نیفروولوجی صرف دہلی کے ایمس میں ہی دستیاب ہے ۔ ڈاکٹر امیش کمار نے بتایا کہ شوگر ہونے کی وجہ سے لالو یادو کے گردے متاثر ہورہے ہیں ۔ حالانکہ شوگر کم کرنے کے لیے انسولین کی دوائیں دی جارہی ہیں ۔ اس کے باوجود بھی گردے کے کام کرنے کی شرح میں نمایاں کمی واقع ہوئی ہے ۔ گذشتہ دنوں یہ کہا جارہا تھا کہ لالو یادو کو ہاوڑا جیل میں منتقل کیا جائے گا لیکن ان کی صحت میں دن بہ دن گراوٹ آرہی ہے ۔ لہذا بہتر علاج کیلئے انہیں ڈاکٹروں کی نگرانی میں رکھنا ضروری ہے ۔۔