’غریبوں کے مسیحا‘ نامی کتاب کا اجراء ‘ارکان خاندان اور پارٹی کارکنوں میں جوش وخروش
پٹنہ:راشٹریہ جنتا دل (آر جے ڈی) سربراہ اور بہار کے سابق وزیر اعلیٰ لالو پرساد یادو نے ہفتہ کو اپنی 75و ویں سالگرہ ارکان خاندان اور پارٹی قائدین کے ساتھ منا ئی۔ اس موقع پر آر جے ڈی کارکنان میں زبردست جوش و خروش دیکھا گیا۔ پٹنہ میں سابق وزیر اعلیٰ رابڑی دیوی کی رہائش پر رات کو 12 بجے کیک کاٹا گیا اور پھر ہفتہ کو آر جے ڈی دفتر میں 75 کلوگرام کا لڈو خاص انداز میں کاٹا گیا۔ آر جے ڈی سربراہ کی سالگرہ پر پٹنہ کی سڑکوں کے کنارے نیک خواہشات والے بڑے بڑے پوسٹر اور بینر بھی لگائے گئے۔لالو پرساد کی سالگرہ کے پیش نظر رابڑی دیوی کے رہائشی احاطہ میں شجرکاری بھی کی گئی۔ آر جے ڈی سربراہ کو ان کے بیٹے تیجسوی یادو، تیج پرتاپ یادو، بیٹی ڈاکٹر میسا بھارتی سمیت دیگر لوگوں نے سالگرہ کی مبارکباد پیش کی۔ آر جے ڈی لیڈروں اور کارکنان نے لالو پرساد کے یوم پیدائش کو سماجی انصاف اور یوم خیر سگالی کے طور پر منایا۔ میسا بھارتی نے اپنے آفیشیل ٹوئٹر ہینڈل سے ٹوئٹ کر کے لکھا کہ ’’انسان آئیں گے، جائیں گے، لیکن جو سماجی انصاف کی ناقابل فراموش اور مضبوط وراثت بن کر ہر کمزور کی زبان پر سدا کے لیے سج جائیں گے، وہی لالو جی کہلائیں گے۔ سالگرہ کی مبارکباد پاپا۔‘‘ہفتہ کے روز لالو پرساد دوپہر دونوں بیٹوں تیج پرتاپ اور تیجسوی کے ساتھ آر جے ڈی دفتر بھی پہنچے۔ یہاں کارکنان نے ان کا زوردار استقبال کیا۔ اس موقع پر آر جے ڈی صدر نے 75 کلو کا لڈو خاص انداز میں کاٹا اور لوگوں کو کھلایا۔ اس موقع پر ’غریبوں کے مسیحا‘ نامی کتاب کا اجراء بھی کیا گیا۔
