دکانیں بند، سڑکیں سنسان، تعینات پولیس عملہ میں اضافہ، جابجا تلاشی مہم، ہاسپٹلس میں کوویڈ مریض
نئی دہلی ۔ قومی دارالحکومت دہلی میں لاک ڈاؤن کے پہلے دن منگل کومصروف ترین بازار سنسان رہے اور ریلوے اسٹیشنوں اور بس اڈوں پرمہاجر مزدوروں کی بھیڑ دیکھی گئی ۔ وزیر اعلی اروند کیجریوال کے پیر کے روز لاک ڈاؤن کا اعلان کرنے کے بعد ہی مہاجر مزدوروں کی بھاری بھیڑ آنند بہار بس اسٹیشن ، ریلوے اسٹیشن اور بین ریاستی بس اڈے پر دیکھی گئی ۔ جو مسلسل بڑھتی ہی جارہی ہے ۔ نئی دہلی ریلوے اسٹیشن پر بھی بڑی تعداد میں مزدور اپنی اپنی ریاستوں کو واپس جانے کے لئے جمع ہوئے تھے ۔ دہلی میں کورونا کیسز میں اضافے کے بعد مسٹر کیجریوال نے لیفٹیننٹ گورنر انل بیجل سے میٹنگ کے بعد اگلے پیر کی صبح 5 بجے تک کے لئے لاک ڈاؤن کا اعلان کیا تھا اور مزدوروں سے اپنے گھروں کو واپس نہ جانے کی اپیل کی تھی ۔ وزیر اعلیٰ کے لاک ڈاؤن کے اعلان کے بعد آنند بہار، کوشمبی بس اڈے اور میں لوگوں کی بھاری بھیڑ جمع ہو گئی اور کووڈ کے ضابطوں پر بھی عمل نہیں کیا جا رہا تھا ۔ زیادہ تر لوگوں کا کہا تھا کہ کورونا وبا پر قابو کے بعد ہی وہ سبھی دہلی لوٹیں گے ۔ کچھ فیکٹریوں کے بند ہونے کے بعد مزدور واپس اپنے گھروں کو لوٹ رہے تھے ۔ دارالحکومت کے مصروف ترین کناٹ پلیس میں بھی آج دکانیں بند رہیں اور سڑکیں سنسان رہی ۔ جگہ جگہ پر سکیورٹی اہلکاروں کی تعیناتی دیکھی گئی ۔ جو آنے جانے والے لوگوں کی چیکنگ کر رہے تھے ۔ کئی کاروباری تنظیموں نے خود ہی بند کا اعلان کیا ہے ۔ جن میں پرانی دہلی کا چاندنی چوک ، کھاری باولی ، صدر بازار اور گاندھی نگر وغیرہ شامل ہیں ۔ قومی دارالحکومت میں پبلک ٹرانسپورٹ اور میٹرو خدمات جاری ہیں ، لیکن ان میں محدود تعداد میں لوگوں کو آنے جانے کی اجازت ہے ۔ دہلی میں لاک ڈاؤن کے دوران لازمی خدمات میں اشیائے خوردنی اور طبی خدمات کو مستثنیٰ رکھا گیا ہے ۔ اس دوران مرکزی حکومت کے دفاتر کھلے رہیں گے ۔ دریں اثناء قومی راجدھانی کے اسپتالوں میں منگل کو ایک بجے تک کورونا وائرس کے سنگین مریضوں کے لئے صرف 32 کووڈ۔19 آئی سی یو بیڈ باقی رہ گئے ہیں۔ دہلی کووڈ ویب سائٹ کے ڈاٹا کے مطابق یہ معلومات سامنے آئی ہے ۔ ویب سائٹ کورونا ڈاٹ دہلی ڈاٹ جی او و ڈاٹ ان کے مطابق دہلی میں کووڈ۔19آئی سی یو بیڈ کی تعداد 4448تھی جن میں سے سنگین مریضوں کے لئے صرف32بیڈ خالی ہیں۔ راجدھانی میں کووڈ مریضوں کے لئے 19126بیڈ تھے جن میں سے اس وقت 16587بیڈ پرمریض ہیں اور 4448آئی سی یو بیڈ میں سے 4416بیڈ پر مریضوں کا علاج کیا جارہا ہے اب صرف 32آئی سی یو بیڈ باقی رہ گئے ہیں۔ وزیراعلی اروند کیجریوال نے پیر کو دہلی میں آئندہ چھ دنوں کے لئے لاک ڈاون کااعلان کیا تھا جو پیر کی رات دس بجے سے نافذ ہوگیا ہے اور 26اپریل صبح پانچ بجے تک رہے گا۔