نئی دہلی، 2مئی (سیاست ڈاٹ کام) عالمی وبا کورونا وائرس کی وجہ سے لاک ڈاون کے چار مئی سے شروع ہونے والے تیسرے مرحلہ میں دہلی میں وائرس کے معاملات میں مسلسل اضافہ کے پیش نظر دہلی کو کوئی راحت نہیں ملنے والی ہے اورتمام اضلاع ‘ریڈ زون’ میں رکھے گئے ہیں۔پیر سے لاک ڈاون کا تیسرا مرحلہ شرو ع ہوگا جو 17مئی تک چلے گا۔ تیسرے مرحلہ میں ملک کو تین زون میں تقسیم کیا گیا ہے ۔ زون کے حساب سے لاک ڈان میں کچھ راحتیں بھی دی گئی ہیں لیکن دہلی ریڈ زون میں ہے اس لئے یہاں کوئی ڈھیل نہیں ملنے والی ہے بلکہ مزید سختی کے ساتھ عمل کرنے کی ہدایت دی گئی ہے ۔وزیر صحت ستیندر جین نے کہا کہ آئندہ دو ہفتہ تک راجدھانی کے تمام گیارہ اضلاع میں لاک ڈاون میں کسی طرح کی نرمی نہیں دینے کا فیصلہ کیا گیا ہے ۔