ممبئی :عالمی شہرت یافتہ لتا منگیشکر نے گزشتہ سال 6 فروری کو، یعنی آج ہی کی تاریخ میں اس دنیا کو الوداع کہا تھا۔ آج انھیں پوری دنیا میں یاد کیا جا رہا ہے۔ اس موقع پر ممبئی کے حاجی علی چوک پر لتا منگیشکر کی یادگار قائم کیے جانے کی بنیاد رکھ دی گئی ہے۔ لتا منگیشکر کا مجسمہ تیار کیا جائے گا اور آج جب اس کے لیے بھومی پوجن کی گئی تو ان کی بہن اوشا منگیشکر سمیت فلم انڈسٹری کی کئی نامور ہستیاں موجود تھیں۔ ممبئی میں تعمیر ہورہی کوسٹل روڈ کو بھی لتا کا نام دینے کی ریاستی حکومت سے گزارش کی گئی ہے۔ لتا منگیشکر اسمارک کے لیے بی ایم سی نے 50 لاکھ روپے تک کا بجٹ رکھا ہے۔ بی ایم سی ان کی 40 فیٹ کی مورتی بنوائے گا اور اس کام کی تکمیل میں 3 ماہ لگنے کا اندازہ ہے۔میڈیا رپورٹس کے مطابق لتا منگیشکر اسمارک کو ’سروں کا کلپ ورکش‘ نام دیا جائے گا۔ مہاراشٹرا اور ممبئی میں پہلی بار ایسا اسمارک بننے جا رہا ہے جو آسمان اور زمین کے رشتے کو ایک ’ورکش‘ یعنی درخت سے جوڑے گا۔ اس اسمارک کو پوری طرح تیار ہونے میں تقریباً 6 ماہ کا وقت لگ سکتا ہے۔
