لندن،13اکتوبر(سیاست ڈاٹ کام)برطانیہ میں دسمبر میں ہونے والے عام انتخابات سے قبل جاری مہم کے دوران اپوزیشن لیبر پارٹی کی ویب سروس پر ہیکرز نے دوسرے روز بھی حملے کئے ۔ خبررساں ایجنسی رائٹر کی رپورٹ کے مطابق انتخابات سے چند ہفتہ قبل ہی لیبر پارٹی کی ویب سائٹ کو بدترین ہیکنگ کے ذریعہ بند کرنے کو شش کی گئی۔ لیبرپارٹی نے اپنے بیان میں کہا تھا کہ ’’پارٹی کے ڈجیٹل پلیٹ فارم پر بڑے پیمانے پر مخصوص حملے کیے گئے ہیں لیکن ان حملوں کو مکمل طور پر ناکام بنادیا گیا ہے اور کوئی دستاویز چوری نہیں ہوئی۔‘‘ برطانیہ کی اپوزیشن پارٹی کے ترجمان نے دوسرے سائبر حملے کے حوالہ سے کہا کہ ’’ہم اپنے پلیٹ فارمز کو محفوظ بنانے کے لئے سیکورٹی کے عمل سے گزر رہے ہیں اور صارفین کو کچھ مختلف بھی نظر آئے گا جس کے لئے ہم فوری اور مستعدی سے مصروف ہیں‘‘۔ رپورٹ کے مطابق برطانوی سیکورٹی ایجنسیوں نے خبردار کیا ہے کہ روس اور دیگر ممالک 12 دسمبر کے انتخابات میں خلل ڈالنے کے لئے سائبر حملے کرسکتے ہیں یا سوشل میڈیا پر سیاسی پیغامات پھیلانے کی کوشش کرسکتے ہیں۔ دوسری جانب روس نے انتخابات میں مداخلت کے ان تمام الزامات کو مسترد کردیا ہے ۔ برطانیہ کی خفیہ ایجنسی سے منسلک نیشنل سائبر سیکورٹی سینٹر کا کہنا تھا کہ پہلا حملہ سروس کی عدم دستیابی کے حوالہ سے کیا گیا اور یہ تکنیکی حملہ ویب سائٹ کو ڈاؤن کرنے کے لئے استعمال کرتے ہیں۔ ان کا کہنا تھا کہ حملہ کی نوعیت کے مطابق کسی فرد یا گروپ کو اس کا ذمہ دار ٹھہرانا مشکل ہوتا ہے ۔