لندن : سابق وزیراعظم نواز شریف کی لندن میں رہائش گاہ ایون فیلڈ اپارٹمنٹس کے باہر نقاب پوش افراد نے احتجاج مظاہرہ کیا ہے۔ایون فیلڈ اپارٹمنٹس کے باہر مظاہرین نے ہاتھوں میں پلے کارڈس اُٹھا تھامے ہوئے تھے جن پر ’’گو نواز گو‘‘ کے نعرے درج تھے تاہم نقاب پوش افراد مظاہرے کے کچھ دیر بعد منتشر ہوگئے۔ شریف فیملی کے ذرائع کے مطابق پولیس کو واقعہ سے آگاہ کر دیا گیا ہے۔ ایون فیلڈ فلیٹس کے باہر مشتعل افراد نے مظاہرہ کے دوران دروازہ توڑنے کی کوشش کی ۔ پولیس نے کہا کہ مظاہرین نے احتجاج کیلئے اجازت نہیں مانگی تھی اور کورونا کے باعث 6 سے زائد افراد کے اجتماع کی اجازت نہیں ہے۔ دوسری جانب پاکستان تحریک انصاف (پی ٹی آئی) برطانیہ نے احتجاجی مظاہرے سے لاتعلقی کا اعلان کیا ہے۔ خیال رہے کہ سابق وزیر اعظم نواز شریف نومبر 2019 سے لندن میں مقیم ہیں جہاں ان کا علاج جاری ہے۔ اس سے قبل بھی جولائی 2018ء میں تحریک انصاف کی جانب سے ایون فیلڈ ریفرنس کے باہر احتجاجی مظاہرے کیے گئے تھے اور اس دوران لیگی حامیوں کے ساتھ ہاتھا پائی بھی ہوئی تھی۔