12 ریاستوں اور مرکزی علاقوں کے 94 حلقوں میں کل ووٹنگ
نئی دہلی : لوک سبھا انتخابات 2024 کا سفر آگے بڑھ رہا ہے کیونکہ ووٹنگ کا تیسرا مرحلہ 7 مئی کو ہونے والا ہے۔ اس مرحلے میں 12 ریاستوں اور مرکز کے زیر انتظام علاقوں میں پھیلے ہوئے 94 لوک سبھا حلقوں کے ووٹر 1,352 امیدواروں کی قسمت کا سیاسی فیصلہ کرنے کیلئے ووٹ دیں گے۔لوک سبھا انتخابات کا تیسرا مرحلہ اہمیت کا حامل ہے کیونکہ اس میں مرکزی وزیر ایس پی سنگھ بگھیل، یوپی کے وزیر سیاحت جے ویر سنگھ، وزیر مملکت برائے ریونیو انوپ پردھان بالمیکی، اور ملائم سنگھ یادو کے خاندان کے کئی افراد کی قسمت پر مہر لگ جائے گی۔ بگھیل، جے ویر، اور بالمیکی آگرہ (ایس سی)، مین پوری، اور ہاتھرس (ایس سی) لوک سبھا سیٹوں سے الیکشن لڑ رہے ہیں۔ موجودہ مرحلہ سماج وادی پارٹی کے یادو خاندان کیلئے بھی اہم ہے، جس میں ڈمپل یادو کا مقصد مین پوری لوک سبھا سیٹ کو برقرار رکھنا ہے جو انہوں نے اپنے سسر اور ایس پی کے سرپرست ملائم سنگھ یادو کے انتقال کے بعد ضمنی انتخابات میں جیتا تھا۔لوک سبھا انتخابات کے تیسرے مرحلے کی مہم ختم ہوگئی۔ 12 ریاستوں کے 94 حلقوں میں 7 مئی کو رائے دہی ہوگی۔ کرناٹک کے بقیہ 14 حلقوں اور گجرات کے تمام 26 حلقوں کے لیے انتخابات کے اس مرحلہ ووٹ ڈالے جائیں گے۔ آسام، بہار، مدھیہ پردیش، مغربی بنگال اور اتر پردیش کی کئی سیٹوں پر بھی پولنگ ہوگی۔ پہلے مرحلہ میں 19اپریل کو 102حلقوں میں ووٹنگ ہوئی تھی جبکہ26اپریل کو دوسرے مرحلہ میں 88حلقوں میں ووٹ ڈالے گئے تھے۔
