نئی دہلی: چیف الیکشن کمشنر راجیو کمار نے انتخابات کی تاریخوں کا اعلان کیا اور بتایا کہ ہندوستان میں عام انتخابات 19 اپریل کو شروع ہوں گے اور یہ 7 مرحلوں میں مکمل ہوں گے۔ ان کے اس اعلان کے ساتھ ہی پورے ملک میں ضابطہ اخلاق نافذ ہو گیا۔پریس کانفرنس سے خطاب کرتے ہوئے راجیو کمار نے بتایا کہ پہلے مرحلہ کیلئے 19 مارچ کو 102 سیٹوں پر پولنگ اعلامیہ جاری ہوگا۔ ووٹوں کی گنتی 4 جون کو ہوگی اور 6 جون کو انتخابات کو مکمل قرار دیا جائے گا۔سی ای سی راجیو کمار نے کہا کہ ہمارا عہد ہے کہ ہم ملکی انتخابات ایسے انداز میں منعقد کریں گے کہ ہندوستان کی شہرت عالمی سطح پر روشن ہو سکے۔ ہر انتخاب آئین کی جانب سے دی گئی ایک اہم ذمہ داری ہے۔ الیکشن کمیشن غیر جانبدارانہ اور شفاف انتخابات کے لئے اپنے پختہ عزم پر قائم ہے۔سترہویں لوک سبھا کی مدت 16 جون کو ختم ہو رہی ہے۔ آندھرا پردیش، اوڈیشہ، اروناچل پردیش اور سکم کی قانون ساز اسمبلیوں کی مدت بھی جون 2024 کی مختلف تواریخ میں ختم ہو رہی ہے۔ جموں و کشمیر میں بھی انتخابات ہونے ہیں۔انہوں نے مزید کہا کہ ملک میں تقریباً 97 کروڑ رجسٹرڈ ووٹرز، الیکشن کیلئے 10.5 لاکھ پولنگ اسٹیشنز، 1.5 کروڑ پولنگ عہدیدار اور سیکورٹی عملہ تعینات کیا جائے گا جبکہ 55 لاکھ الیکٹرانک ووٹنگ مشینیں اور 4 لاکھ گاڑیاں استعمال کی جائیں گی ۔چیف الیکشن کمشنر نے کہا کہ ملک میں 29 سال تک کی عمر کے قریب 21.5 کروڑ نوجوان ووٹرز ہیں۔ 1.82 کروڑ ووٹر ایسے ہیں جو پہلی بار ووٹ دیں گے۔ یہ تمام افراد اپنے مستقبل کا فیصلہ کرنے کیلئے ووٹ ڈالیں گے۔ اس ملک میں کل ووٹرز کی تعداد 96.8 کروڑ ہے، جن میں سے 49.7 کروڑ مرد اور 47 کروڑ خواتین شامل ہیں۔ اس اعلان کے ساتھ ہی آج سے ملک بھر میں ماڈل ضابطہ اخلاق نافذ ہو گیا ہے ۔ چیف الیکشن کمشنر راجیو کمار نے دونوں کمشنروں گیانیش کمار اور سکھبیر سنگھ سندھو کے ساتھ آج وگیان بھون میں پریس کانفرنس میں تمام 543 لوک سبھا سیٹوں کے ساتھ سکم، اروناچل پردیش، اڈیشہ اور آندھرا پردیش کے اسمبلی انتخابات اور مختلف ریاستوں کی اسمبلیوں کی 26 خالی نشستوں پر ضمنی انتخابات کے شیڈول کاا علان کیا۔ انہوں نے کہا کہ انتخابات کا عمل 20 مارچ کو پہلے نوٹیفکیشن کے ساتھ شروع ہوگا۔پہلے مرحلے میں 21 ریاستوں کی 102 سیٹوں پر، دوسرے مرحلے میں 13 ریاستوں کی 89 سیٹوں پر، تیسرے مرحلے میں 12 ریاستوں کی 94 سیٹوں پر، چوتھے مرحلے میں 10 ریاستوں کی 96 سیٹوں پر، پانچویں مرحلے میں 10 ریاستوں کی 96 سیٹوں پر ووٹنگ ہو گی۔ آٹھ ریاستوں میں 49 سیٹوں پر، چھٹے مرحلے میں سات ریاستوں کی 57 سیٹوں پر ووٹنگ ہو گی اور ساتویں مرحلے میں آٹھ ریاستوں کی 57 سیٹوں پر ووٹنگ ہو گی۔ اتر پردیش کی 80 سیٹوں کے لیے تمام سات مرحلوں میں ووٹنگ ہوگی چیف الیکشن کمشنر نے کہا کہ 2.18 لاکھ ووٹرز کی عمر 100 سال سے زیادہ ہے ۔ اس بار کمیشن نے 85 سال سے زیادہ عمر اور 40 فیصد تک معذور ی کے حامل ووٹروں کو گھر بیٹھے ووٹ دینے کا اختیار دیئے جانے کا فیصلہ کیا ہے ۔