ممبئی،15 فروری (ایجنسیز) بالی ووڈ اداکار رنبیرکپور انڈسٹری کے سب سے بڑے ستاروں میں سے ایک ہیں۔ اس میں کوئی شک نہیں کہ رنبیر اس وقت اپنے کیریئر کے عروج پر ہیں اور انڈسٹری کے باصلاحیت اداکاروں میں سے ایک ہیں۔ رنبیر کے پاس اس وقت کئی دلچسپ پروجیکٹس ہیں، اور ان کی آنے والی فلموں کا بے صبری سے انتظار ہے۔ فی الحال، رنبیر کے پاس نتیش تیواری کی رامائن، ونگا کا اینیمل پارک، اور سنجے لیلا بھنسالی کی لو اینڈ وار قطار میں ہے، جس کے لیے مداح کافی پرجوش ہیں۔رنبیر کپور ایک بار پھر اپنی اہلیہ عالیہ بھٹ کے ساتھ اسکرین شیئر کرنے کے لیے تیار ہیں۔ مداح ان کی فلم لو اینڈ وارکا کافی عرصے سے انتظارکر رہے تھے۔ اس فلم کی ہدایت کاری معروف کیمرہ جادوگر سنجے لیلا بھنسالی کررہے ہیں، اس لیے ہر کوئی اس کا بے صبری سے انتظار کر رہا ہے۔ لیکن اب لگتا ہے انتظار مزید طویل ہو سکتا ہے۔میڈیا رپورٹس کے مطابق لو اینڈ وار کو ملتوی کردیا گیا ہے۔ اس بات کا انکشاف رنبیرکپور نے اپنے انسٹاگرام لائیو سیشن کے دوران کیا۔ یہ واضح نہیں ہے کہ فلم کو کب تک کے لئے پیچھے دھکیل دیا گیا ہے لیکن اس خبر نے ان شائقین کو مایوس ضرورکیا ہے جو اس کا انتظار کر رہے تھے۔ یہ خیال کیا جاتا ہے کہ فلم بنانے والوں نے یہ فیصلہ رنویر سنگھ کی دھورندھر2 اور یش کی ٹاکسک کے ساتھ ٹکراؤ سے بچنے کے لیے کیا ہے۔درحقیقت، لو اینڈ وار کے متعلق پہلے ہی کافی الجھنیں موجود ہیں۔ یہ فلم اصل میں کرسمس 2025 پر ریلیز کی جانے والی تھی ۔ اس کی ریلیز سے ٹھیک پہلے اسے20 مارچ 2026 تک ملتوی کردیا گیا تھا۔ تاہم رنویر سنگھ کی دھورندھر 2 اور یش کی ٹاکسک 19 مارچ کو ریلیز ہو رہی ہیں، جس سے لو اینڈ وار کے بنانے والوں کو فلم کو ملتوی کرنا پڑا۔ فی الحال اس بارے میں کوئی تازہ خبر نہیں ہے کہ شائقین فلم کب دیکھ سکیں گے لیکن امید کی جارہی ہے کہ اس کا جلد اعلان کردیا جائے گا۔
