بھوپال : مدھیہ پردیش کی راجدھانی بھوپال کے ریلوے اسٹیشن کے احاطے میں واقع گیسٹ ہاؤس میں اترپردیش کی ایک لڑکی کی آبروریزی کے الزام میں ریلوے کے دو افسران کو گورنمنٹ ریلوے پولس (جی آر پی) نے گرفتار کرلیا ہے ۔جی آر پی پولس سپرنٹنڈنٹ ہتیش چودھری نے آج بتایا کہ کل دیر رات دونوں ملزموں راجیش تیواری اور آلوک مالویہ کو گرفتار کرلیاگیا ہے ۔ راجیش تیواری ریلوے میں جونیئر انجینئر (سیفٹی کاؤنسلر) اور آلوک مالویہ سینئر سیکشن انجینئر کے طور پر تعینات ہیں۔جی آر پی ذرائع نے بتایا کہ دونوں ملزموں نے بھوپال کے اہم ریلوے اسٹیشن کے احاطے میں واقع گیسٹ ہاؤس میں کل جھانسی کے رہنے والی لڑکی کو مبینہ طور پر نوکری دلانے کے نام پر بلایا تھا۔ جھانسی سے اسٹیشن پہنچی لڑکی کو ملزم راجیش تیواری گیسٹ ہاؤس لے گیا اور اسے پینے کی چیز میں نشیلی اشیاء ملا دی۔ جس کے بعد وہ بے ہوش ہوگئی، اس کے بعد اس کی آبروریزی کی گئی۔
