حیدرآباد : 18 نومبر ( سیاست نیوز) سائبر آباد کے علاقہ میں مندر کے قریب دھماکہ پیش آیا جس میں پجاری زخمی ہوگیا ۔ مندر کے قریب دھماکہ اور پجاری کے زخمی ہونے کی اطلاع سے علاقہ میں سنسنی پھیل گئی ۔ اطلاع پر پولیس عہدیدار لکشمی گوڑہ پہنچے ۔ یہ مندر جس کے قریب دھماکہ ہو ایئرپورٹ کارگو کے قریب پایا جاتا ہے ۔دھماکہ کے متعلق پولیس نے قطعی طور پر کچھ نہیں بتایا بلکہ پجاری کا علاج جاری ہے جس کی حالت خطرہ سے باہر ہے ۔ اے سی پی راجندر نگر سرینواس نے بتایا کہ مائیلاردیو پلی پولیس حدود میںیہ واقعہ پیش آیا ۔ لکشمی گوڑہ علاقہ میں راجستھان پرجا پتی مندر ہے اور اس میں سگنارام پجاری کی خدمات انجام دے رہا ہے ۔ آج صبح تقریباً 10:30 بجے صفائی کے دوران یہ دھماکہ ہوا ۔ انہوں نے بتایا کہ پولیس کی جانب سے بم اسکواڈ اور فارنسک ٹیم کو طلب کرلیا گیا اور شواہد اکٹھا کرکے ایف ایس ایل روانہ کردیا گیا ۔ پولیس یہ پتہ چلانے میں مصروف ہے کہ دھماکہ کس وجہ سے پیش آیا یا کوئی دھماکو اشیاء موجود تھی ۔ مائیلاردیو پلی پولیس نے بتایا کہ سگنارام کی حالت خطرہ سے باہر ہے ۔ابتدائی تحقیقات کے دوران پولیس اور کلوز ٹیم کو کوئی ایسا سراغ یا پھر مشتبہ شئے دستیاب نہیں ہوئی جس سے کہ اس بات کا پتہ چل سکے کہ کسی نے جان بوجھ کر دھماکہ کیا ہو یا پھر دھماکو اشیاء رکھی گی ہو پولیس نے مقدمہ درج کرلیا اور مصروف تحقیقات ہے ۔ ع
