پرتاپ گڑھ 15مارچ (سیاست ڈاٹ کام )پیس پارٹی کے قومی نائب صدر ڈاکٹر عبدالرشید انصاری نے لکھنو گھنٹہ گھر پر بارش سے بھیگنے کے سبب ہوئی تین مظاہرین خواتین کے انتقال پر تعزیت پیش کرتے ہوئے کہا کہ وہ شہید ہیں جنہوں نے آئین کی بقاء کیلئے اپنی جان کی پرواہ نہیں کی اور شہید ہوگئیں ۔ ان شہید مظاہرین کی قربانیاں رائیگاں نہیں جائیں گی ۔انہوں جاری پریس ریلیز کے ذریعہ اپنے تعزیتی پیغام میں مذکورہ تاثرات کا اظہار کیا ۔ڈاکٹر انصاری نے کہا کہ بی جے پی حکومت نے قوم پر سی اے اے ، این آر پی و این آر سی مسلط کر کے انہیں آئین کی بقاء کیلئے دھرنا مظاہرہ کیلئے مجبور کر دیا ، جس کے سبب ہماری خواتین کو سڑکوں پر نکلنا پڑا ۔حکومت اظہار آزادی پر پابندی لگا کر جہاں آئین کے وقار کو پامال کر رہی ہے ۔وہیں ہماری خواتین آئین کے وقار کو مجروح ہونے سے بچانے کیلئے اپنے عزم پر ڈٹی ہوئی ہیں ۔گزشتہ تقریبا دو ماہ سے مسلسل ٹھنڈ و بارش کی پرواہ کیئے بغیر مظاہرہ جاری ہے ۔ابھی تک سردی و بارش سے بھیگنے کے سبب تین مظاہرین خواتین کا انتقال ہو چکا ہے ، لیکن ان مظاہرین کے حوصلے میں کوئی کمی نہیں آئی بلکہ بلند ہیں ۔انتظامیہ و پولیس کی بے حسی کا سبب یہ ہے کہ ایک ٹینٹ بھی لگانے کی اجازت نہیں دی لیکن کھلے آسمان کے نیچے بارش و ٹھنڈ کے باوجود ان آئین مجاہدین کے حوصلے پست نہیں ہوئے ۔تین مظاہرین کی شہادت کے بعد بھی پولیس انتظامیہ نے نوٹس نہیں لیا اور وہ انسانی حقوق کو پامال کرنے پر آمادہ ہے ۔
